ភ្នំពេញ៖ លោក ផៃ ស៊ីផាន រដ្ឋលេខា ធិការ និងជាអ្នកនាំពាក្យទីស្តីការគណៈរដ្ឋមន្ត្រី នាព្រឹកថ្ងៃទី១៣កក្កដានេះ បានចាត់ទុកមតិភាគតិចនៅក្នុងសភាត្រូវបានអន្តរាយដោយតំណាងរាស្ត្ររបស់ខ្លួនដោយសារ ក្រុមអ្នកតំណាងរាស្ត្រគណបក្សសង្គ្រោះជាតិ បានធ្វើពហិកាជំទាស់នឹការអនុម័តលើសេចក្តីព្រាងច្បាប់គ្រប់គ្រងសមាគម និងអង្គការក្រៅរដ្ឋាភិបាល។
ក្នុងគណនីហ្វេសប៊ុករបស់លោក ផៃ ស៊ីផាន បានសរសេរថា “ការបោះបង់ភារកិច្ចក្នុងការតស៊ូរមត្តិបស់តំណាងរាស្ត្រភាគតិច CNRP ( គណបក្សសង្គ្រោះជាតិ ) នៅក្នុងរដ្ឋសភា គឺជាការប៉ះពាល់ដ៏ធ្ងន់ធ្ងរនូវដំណើរការប្រជាធិបតេយ្យសង្គមសេរី។ ពហិកា ជាពាក្យ ឬសកម្មភាពមួយនៃគណបក្សភាគតិចបានប្រើប្រាស់ជាយុទ្ធសាស្ត្ររបស់ខ្លួន បង្ហាញនូវការមិនពេញចិត្តនឹងអ្វីមួយនៅក្នុងដំណើរការងារនយោបាយ”។
ក៏ប៉ុន្តែ លោក ផៃ ស៊ីផាន បានលើកឡើងថា “ប្រជារាស្ត្រនៃអ្នកបោះឆ្នោតទេ ដែលត្រូវបាត់បង់នូវមតិតតាំងនយោបាយ ដែលជាកិច្ចតស៊ូមតិនៃផលសង្ឃឹមទុករបស់អ្នកផ្តល់សន្លឹកឆ្នោតជូន។ ថ្វីត្បិតមតិរបស់អ្នកតំណាងរាស្ត្រភាគតិចនៅក្នុងរដ្ឋសភាគ្រាន់តែជាផ្នែកមួយ ឬជ្រុងមួយសម្រាប់បង្ហាញ ឬតស៊ូ ប្រជែងមតិជាមួយអ្នកតំណាងរាស្ត្រមតិភាគច្រើន និងជូនសាធារណៈជនពិចារណា គឺមិនមែនជាមតិរបស់អ្នកតំណាងរាស្ត្រភាគតិចដែលជាទិសដៅនៃចំនួន សន្លឹកឆ្នោតគាំទ្រ ឬមិនគាំទ្រ នៅក្នុងលទ្ធផលនៃការអនុម័តលើសេចក្តីព្រាងច្បាប់ណាមួយនោះឡើយ”។
លោក ផៃ ស៊ីផាន បានបន្ថែមថា “ការបោះបង់ ឬពហិកាជាសកម្មភាពមួយបន្ថែមទៀត ក្នុងការបង្កើតបាននូវអ្វីដែលជាការព្រមព្រៀងរវាងគណបក្សCPP និងCNRP ក្នុងកិច្ចសម្របសម្រួលរបស់ CPP មិនត្រឹមតែផ្តល់តំណែងទទួលខុសត្រូវនៅក្នុងគណៈកម្មការរបស់សភា ប៉ុណ្ណោះទេ ក៏ប៉ុន្តែCPP ត្រូវការដៃគូពិភាក្សា តតាំងមតិក្នុងការងាររបស់សភា។ ទង្វើរបស់ CPP គ្រប់គ្រាន់ហើយ ក៏មិនដែលមាននៅក្នុងបច្ចឹមប្រទេស ក្នុងការប្រគល់តួនាទីដូចនេះ ដោយ CPP បានប្តេជ្ញាក្នុងកិច្ចការងារកំណែទម្រង់ឲ្យរឹតតែបានស៊ីជម្រៅនៃ ប្រជាធិបតេយ្យក្នុងសភាទាំងការងារ ក៏ដូចជាការផ្សះផ្សារជាតិ”។
លោក ផៃ ស៊ីផាន បានគូសបញ្ជាក់ថា “នៅពេលនេះ ខ្លួនខ្ញុំផ្ទាល់ យល់ឃើញថា ភាពចាស់ទុំ និងប្រជាធិបតេយ្យនៃការចូលរួមរបស់CNRP នៅមានគម្លាតឆ្ងាយណាស់ ហើយផលរំពឹងទុករបស់ប្រជាពលរដ្ឋដែលបានបោះឆ្នោតជ្រើសរើសCNRP គឺជាការខាតបង់ត្បិត CNRP គ្មានអ្វីក្រៅពីធ្វើគ្រប់បែបយ៉ាងដើម្បីតែឈ្នះតែប៉ុណ្ណោះ។ ម្យ៉ាងទៀត CNRP បានបោះបង់ចោលនូវអធិបតេយ្យភាពរបស់ខ្លួនជាអ្នកតំណាងរាស្ត្រ នឹងឆ្លើយតាមអ្វីដែលបរទេសបាននិយាយថា ច្បាប់ NGO មិនត្រូវការ ឬមិនសារៈសំខាន់នោះទេ។នេះជាប្រវត្តិសាស្ត្ររបស់អ្នកតំណាងរាស្ត្ររបស់CNRP ក្រៅពីពហិកា គឺមិនឲ្យប្រទេសកម្ពុជាមាននីតិរដ្ឋ និងចាត់ទុក NGO ឲ្យស្ថិតនៅក្រៅច្បាប់តែប៉ុណ្ណោះ”៕ដោយ៖ខេមរៈ
