ស្វីស ៖ ប្រធានអង្គការសុខភាពពិភពលោក (WHO) លោក Tedros Adhanom Ghebreyesus កាលពីថ្ងៃម្សិលមិញបានអំពាវនាវរកថវិកាចំនួន៦៧៥លានដុល្លារអាមេរិកជាជំនួយសម្រាប់ផែនការប្រយុទ្ធប្រឆាំងនឹងវីរុសកូរ៉ូណាថ្មីនេះ ជាពិសេសតាមរយៈការវិនិយោគនៅក្នុងប្រទេសនានា ដែលត្រូវបានគេចាត់ទុកថាមានបញ្ហា និងកំពុងប្រឈមនឹងហានិភ័យខ្ពស់បំផុត។
លោកបានថ្លែងនៅក្នុងសន្និសីទសារព័ត៌មានមួយនៅទីក្រុងហ្សឺណែវថា ថ្ងៃនេះយើងកំពុងរៀបចំផែនការត្រៀម និងឆ្លើយតបជាយុទ្ធសាស្ត្រ …. យើងកំពុងស្នើសុំថវិកាចំនួន ៦៧៥លានដុល្លារអាមេរិក ដើម្បីទ្រទ្រង់ផែនការសម្រាប់រយៈពេល ៣ខែខាងមុខ។ លោក Tedros និយាយថា សាររបស់យើងទៅកាន់សហគមន៍អន្តរជាតិ គឺត្រូវវិនិយោគនៅថ្ងៃនេះ ឬបង់ប្រាក់ច្រើននៅពេលក្រោយ ដោយបន្ថែមថា ការអំពាវនាវរកមូលនិធិគឺ “តិចជាងប្រាក់ដែលយើងនឹងត្រូវចំណាយ ប្រសិនបើយើងមិនវិនិយោគលើការត្រៀមរៀបចំឥឡូវនេះទេ”។
លោក Tedros បានបញ្ជាក់ថាថវិកា ៦០លានដុល្លារនៃមូលនិធិនេះនឹងក្លាយជាប្រតិបត្តិការនានា របស់អង្គការសុខភាពពិភពលោក ចំណែកថវិកានៅសល់នឹងបញ្ជូនទៅកាន់បណ្ដាប្រទេសនានា ដែលត្រូវការជំនួយដើម្បីការពារប្រឆាំងនឹងវីរុសដ៏កាចសាហាវនេះ៕
