រ៉ូម ៖ រដ្ឋាភិបាលអ៊ីតាលីកាលពីថ្ងៃពុធម្សិលមិញបានសម្រេចចិត្តបិទសាលារៀន និងសាកលវិទ្យាល័យទាំងអស់នៅទូទាំងប្រទេសរហូតដល់ពាក់កណ្ដាលខែមីនា ខណៈចំនួនអ្នកស្លាប់ដោយសារ COVID-19 កើនដល់៧៩នាក់ និងច្រើនជាង២,៥០០នាក់បានឆ្លងជំងឺ ដ៏កាចសាហាវមួយនេះ។ នេះបើតាម សារព័ត៌មាន CNN។

បើតាមប្រភពពីមន្ត្រីអ៊ីតាលីម្នាក់ ក្នុងលក្ខខណ្ឌមិនបញ្ចេញឈ្មោះ ការបិទសាលារៀន និងសាកលវិទ្យាល័យ នឹងត្រូវធ្វើឡើងចាប់ពី ថ្ងៃព្រហស្បតិ៍ សប្ដាហ៍នេះ ហើយការបង្រៀនតាមប្រព័ន្ធអ៊ីនធើណិតនឹងចាប់ផ្ដើមនៅថ្ងៃសុក្រ។ ប៉ុន្តែមិនទាន់មានការប្រកាសជាផ្លូវការ ណាមួយនៅឡើយទេ។

ការសម្រេចចិត្តបែបនេះ របស់រដ្ឋាភិបាលអ៊ីតាលី គឺជាផ្នែកមួយនៃកិច្ចខិតខំប្រឹងប្រែងទប់ស្កាត់ការរីករាលដាលនៃជំងឺ COVID-19 ដែលកំពុងវាយលុកខ្លាំងជាងលើតំបន់ភាគខាងជើងនៃប្រទេស៕