ចំនួនអ្នកស្លាប់ដោយកូរ៉ូណានៅអាមេរិកកើនដល់១១៧នាក់
វ៉ាស៊ីនតោន ៖ យោងតាមការបញ្ជាក់របស់មជ្ឈមណ្ឌលអាមេរិកសម្រាប់បង្ការ និងគ្រប់គ្រងជំងឺឆ្លង CDC បានឲ្យដឹងថា ចំនួនអ្នកឆ្លង COVID-19 នៅទូទាំងសហរដ្ឋអាមេរិកបានកើនដល់ ៧,១១១ករណីហើយ ក្នុងនោះមាន១១៧នាក់ បានស្លាប់។ នេះបើតាម ដកស្រង់ផ្សាយដោយសារព័ត៌មាន CNN
ចំនួនអ្នកឆ្លង ៧០ករណី គឺជាពលរដ្ឋធ្វើមាតុនិវត្តន៍មកកាន់សហរដ្ឋអាមេរិក ជាពិសេសគឺពលរដ្ឋអាមេរិក ដែលត្រូវបានជម្លៀសចេញពីកប៉ាល់ Princess Diamond នៅក្នុងប្រទេសជប៉ុន។ ចំណែកឯ ៧,០៤១ករណី ផ្សេងទៀត ត្រូវបានរាយការណ៍នៅក្នុងសហរដ្ឋអាមេរិក។
សូមជម្រាបថា ក្នុងចំណោមរដ្ឋទាំង៥០របស់សហរដ្ឋអាមេរិក រដ្ឋញូយ៉ក គឺមានចំនួនអ្នកឆ្លងច្រើនជាងគេរហូតដល់ជាង ២,៣៨២ករណី៕
