ក្រុងព្រះវិហារ ៖ ផ្ទះឈើសាងសង់លាយឥដ្ឋមួយខ្នង ត្រូវបានភ្លើងឆាបឆេះខូចខាតទាំងស្រុងរួមទាំងទ្រព្យសម្បត្តិមានតម្លឌៃមួយចំនួនធំទៀតផង តែគ្រោះអគ្គិភ័យនេះ​ មិនបណ្តាលឲ្យរងគ្រោះថ្នាក់ដល់នរណាម្នាក់ ឬឆេះរាលដាលដល់ផ្ទះអ្នកជិតខាងឡើយ។

គ្រោះអគ្គិភ័យនេះ កើតឡើងនៅថ្ងៃទី១៩ ខែមីនា ឆ្នាំ២០២០ វេលាម៉ោង ២០ និង៣០នាទី នៅចំណុចផ្ទះឈ្មោះ ស គង់ ស្ថិតនៅក្នុងភូមិទួលទំនប់ សង្កាត់កំពង់ប្រណាក ក្រុងព្រះវិហារ ។

តាមការបញ្ជា្កក់របស់សមត្ថកិច្ចបានឲ្យដឹងថា មូលហេតុដែលនាំឲ្យឆេះអស់ផ្ទះមួយខ្នងនេះ គឺបណ្តាលមកពីបុរសជាប្តីមានជំងឺសរសៃប្រសាទ គួបផ្សំក្នុងថ្ងៃកើតហេតុ គាត់មានការខឹងសម្បារក្នុងក្រុមគ្រួសារ គាត់ក៏បានយកសាំងចាក់ដុតផ្ទះខ្លួនឯងចោលតែម្តង។

សមត្ថកិច្ចបន្តថា បុរសម្ចាស់ផ្ទះដែលមានជំងឺសរសៃប្រសាទនោះឈ្មោះ សេ ធី អាយុ៤១ឆ្នាំ ចំណែកភរិយារបស់គាត់ ឈ្មោះ នង គង់ អាយុ៣៩ឆ្នាំ មុខរបរលក់ដូរ។

ទ្រព្យសម្បត្តិដែលរងការខូចខាតរួមមាន  ៖  ការខូចខាតផ្ទះចំនួន១ខ្នង ទំហំទទឹង ៥ម. បណ្តោយ ១២ម. ធ្វើអំពីឈើ លាយឥដ្ឋប្រក់ស័ង្កសី  បាត់បង់ទ្រព្យសម្បត្តិមានតម្លៃដូចជា ១.លុយរៀលប្រហែល ១០លាន  ២.ខ្សែកមាស ១ដំឡឹង ៣.ខ្សែដៃមាស ៥ជី  ៣.ក្រវិលផ្លាកទីន១គូ ​ ៤.គ្រែ៣គ្រឿង ៥.ទូកញ្ចក់​១គ្រឿង ៦.តុទឹកតែ១គ្រឿង ៧.កូនក្រឡឹង១០គ្រាប់ ៨.ទូរស័ព្ទ១គ្រឿង និងសម្ភារៈផ្សេងៗមួយចំនួនទៀត។

គួរជម្រាបថា ប្រតិបត្តិការពន្លត់អគ្គីភ័យនេះ ធ្វើឡើងក្រោមបទបញ្ជារបស់ ឧ/ទោ សួស សុខដារា ស្នងការដ្នានប្រើកម្លាំងអន្តរាគមន៍ សហកាជាមួយកម្លាំងនគបាលក្រុងព្រះវិហារសរុបបម្រាណ ៧៤នាក់ ប្រើប្រាស់រថយន្តពន្លត់អគ្គីភ័យ ចំនួន៣គ្រឿង បានពន្លត់ឲ្យរលត់ជាស្ថាពរនៅវេលាម៉ោង ៩និង៣០ នាទី ថ្ងៃខែឆ្នាំដដែល ដោយពុំមានប៉ះពាល់ដល់ផ្ទះអ្នកជិខាង ឬបង្ករបួសស្នាមដល់មនុស្សឡើយ៕ ដោយ ៖ កូវ ប៊ុនហេង