ខេត្តកំពង់ចាម ៖ ដេីម្បីឆ្លើយតបតាមការណែនាំ របស់កាកបាទក្រហកម្ពុជា ក្នុងការយកចិត្តទុកដាក់ ចំពោះ ការខ្វះខាតផ្នែកជីវភាព របស់ បងប្អូន ប្រជាពលរដ្ឋងាយរងគ្រោះ ក្នុងស្ថានភាពដែលពិភពលោក ក៏ដូចជា ប្រទេស កម្ពុជា កំពុងប្រឹងប្រែង ក្នុងយុទ្ធនាការ ប្រយុទ្ធប្រឆាំងនឹងជម្ងឺកូវីដ១៩នោះ នាព្រឹក ថ្ងៃទី២៦ ខែឧសភា ឆ្នាំ២០២០នេះ ឯកឧត្តម អ៊ុន ចាន់ដា អភិបាលខេត្ត កំពង់ចាម និង ជាប្រធានគណៈកម្មាធិការសាខា កាកបាទក្រហម កម្ពុជា ខេត្ត បានចាត់លោកជំទាវ ប៉ាង ដានី អនុប្រធានអចិន្ត្រៃយ៍សាខា រួមដំណើរដោយ លោកនាយក នាយករងសាខា មន្ត្រីប្រតិបត្តិ និងលោក ឡោ ចាន់លី ប្រធានកិត្តិយសអនុគណៈកម្មាធិការសាខាស្រុក បានអញ្ជើញចុះ សាកសួរសុខទុក្ខ និងនាំយកអំណោយ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនដល់ជនងាយរងគ្រោះដែលកំពុងខ្វះខាតជីវភាព ចំនួន៦៩គ្រួសារ មកពី៧ឃុំ នៃមូលដ្ឋានស្រុកព្រៃឈរ រួមមាន ៖ ស្ដ្រីមេម៉ាយក្រីក្រកូនច្រើន៨គ្រួសារ ជនចាស់ជរាគ្មានទីពឹង៣៤គ្រួសរ ជនមានពិការភាព ១៧គ្រួសារ និងអ្នកមានជម្ងឺរ៉ាំរ៉ៃ ចំនួន១០គ្រួសារ ។

ថ្លែងក្នុងពិធីសំណេះសំណាលនោះ លោកជំទាវ អនុអចិន្ត្រៃយ៍សាខា បានពាំនាំនូវប្រសាសន៍សួរសុខទុក្ខ ពីសំណាក់ លោក អ៊ុន ចាន់ដា ប្រធានគណៈកម្មាធិការសាខា និង ឯកឧត្តម ហ៊ុន ណេង ប្រធានកិត្តិយសសាខា ជាពិសេស សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាល សម្តេច តែងតែមានសេចក្ដីបារម្ភ និងគិតគូរអំពីសុខទុក្ខ ការលំបាករបស់ប្រជាពលរដ្ឋគ្រប់ៗរូប និងក្នុងគ្រប់ស្ថានភាព និងកាលៈទេសៈ ដោយគ្មានការរើសអើងឡើយ។

យ៉ាងណាម៉ិញ ពេលនេះ សម្ដេចបានចាត់ឲ្យតំណាងចុះជួយអន្តរាគមន៍ ដោះស្រាយការលំបាករបស់បងប្អូនយើង បានទាន់ពេលវេលា ស្របតាមទិសស្លោក «ទីណាមានការលំបាក ទីនោះមានកាកបាទក្រហមកម្ពុជា» ទៅដល់ជានិច្ច ។

ឆ្លៀតក្នុងឱកាសនោះដែរ លោកជំទាវ ប៉ាង ដានី បានក្រើនរំឮកដល់បងប្អូនប្រជាពលរដ្ឋទាំងអស់ សូមបង្កើនការយកចិត្តទុកដាក់ ប្រុងប្រយ័ត្នខ្ពស់ ក្នុងការបន្តចូលរួមបង្ការ ទប់ស្កាត់ហានិភ័យ នៃការឆ្លងជម្ងឺកូវីដ១៩ ដោយមិនត្រូវធ្វេសប្រហែស ឬភ្លេចខ្លួននោះឡើយ ។

ដូច្នេះ ត្រូវចូលរួមថែទាំសុខភាព តាមរយៈវិធានការអនាម័យស្អាត ៣យ៉ាង ការរក្សាគម្លាតសុវត្ថិភាព ពិសេស ការអនុវត្តខ្ជាប់ខ្ជួនតាមសារអប់រំនានា របស់ក្រសួងសុខាភិបាល គឺជាកត្តាចាំបាច់ ដែលត្រូវប្រតិបត្តិឲ្យបានជាប្រចាំ ដើម្បី ជៀសផុតពីការឆ្លង នៃជម្ងឺ ដ៏កាចសាហាវមួយនេះ ទាំងអស់គ្នា ។

សូមបញ្ជាក់ថា អំណោយសម្ដេចកិត្តិព្រឹទ្ធបណ្ឌិត ដែលនាំទៅចែកជូន ជនងាយរងគ្រោះទាំង៦៩ គ្រួសារ ដោយ ក្នុង១គ្រួសារៗ ទទួលបាន អង្ករ២៥គក្រ ត្រីខ ១០កំប៉ុង ទឹកត្រី ១យួរ ទឹកស៊ីអ៊ីវ ១យួរ ម៉ាស់ ៥បន្ទះ និងថវិកាចំនួន ២០.០០០រៀល ផង ដែរ ៕ ដោយ ៖ ប៉ែន សុផល