ទោះបីជាលោកនាយករដ្ឋមន្ត្រី ហ៊ុន សែន បានអំពាវនាវឲ្យម្ចាស់ក្រុម ហ៊ុនឡានដឹកអ្នកដំណើរ ឲ្យបញ្ចុះថ្លៃក៏ដោយ តែការលើកឡើងនេះ នៅតែគ្មានប្រសិទ្ធភាព។ អ្នកវិភាគសេដ្ឋកិច្ចបានលើកឡើងថា កាលណាប្រជាពលរដ្ឋសម្រុកចេញទៅស្រុកច្រើនកុះករបែបនេះ ជាលទ្ធផលនឹងធ្វើឲ្យថ្លៃធ្វើដំណើរត្រូវតែឡើងថ្លៃ ដោយតែក្រុមហ៊ុនផ្គត់ផ្គង់មិនទាន់តាមតម្រូវការ។
ការឡើងថ្លៃខ្ពស់លើសេវាដឹកជញ្ជូនអ្នកដំណើរ ហាក់កើតឡើងជាទម្លាប់ នាឱកាសបុណ្យប្រពៃណីជាតិម្ដងៗ។ ទោះបីជាមានការត្អូញត្អែរពីសំណាក់ប្រជាពលរដ្ឋ និងការអំពាវនាវរបស់ប្រមុខដឹកនាំរដ្ឋាភិបាលយ៉ាងណាក៏ដោយ តែតម្លៃសំបុត្រធ្វើដំណើរនៅតែឡើងថ្លៃខ្ពស់ដដែល។
នាឱកាសបុណ្យភ្ជុំបិណ្ឌនេះ តម្លៃសំបុត្រធ្វើដំណើរទៅបណ្ដាខេត្តសំខាន់ៗមួយចំនួន បានកើនឡើងយ៉ាងហោចណាស់ចំនួនពីរដង ដែលធ្វើអោយការលើកឡើងរបស់លោកនាយករដ្ឋមន្ត្រី ហ៊ុន សែន ហាក់គ្មានប្រសិទ្ធភាព។
លោកនាយករដ្ឋមន្ត្រី ហ៊ុន សែន មានប្រសាសន៍កាលពីថ្ងៃទី១៨ កញ្ញា ថា សូមកុំឲ្យម្ចាស់រថយន្តដឹកអ្នកដំណើរ ឬរថយន្តឈ្នួលយកថ្លៃហួសហេតុ នៅពេលដែលប្រជាពលរដ្ឋ ពិសេសកម្មករជាច្រើននាក់ នឹងធ្វើដំណើរទៅស្រុកកំណើតនាឱកាសបុណ្យភ្ជុំបិណ្ឌនោះ។
បញ្ហានេះ អ្នកវិភាគសេដ្ឋកិច្ច លោក ស្រី ចន្ធី មានប្រសាសន៍ថា តាមរយៈគោលការណ៍ទីផ្សារ នៅពេលដែលតម្រូវការកើនឡើងខ្ពស់នៅក្នុងរយៈពេលខ្លីមួយ ដែលការផ្គត់ផ្គង់មិនអាចឆ្លើយតបបាន តម្លៃត្រូវតែថ្លៃ។ លោកសង្កេតឃើញថា ក្រុមហ៊ុនសេវាដឹកជញ្ជូនអ្នកដំណើរ បានចាប់ផ្ដើមវិនិយោគយ៉ាងច្រើននាពេលបច្ចុប្បន្ន ហើយក្រុមហ៊ុនសេវាដឹកជញ្ជូនទាំងអស់ ដែលតែងតែរួមគ្នាដំឡើងថ្លៃខ្ពស់នាឱកាសបុណ្យប្រពៃណីជាតិម្ដងៗ នោះ មិនមែនកើតឡើងដោយសារការផ្ដាច់មុខនោះទេ។
ការស្រាវជ្រាវដោយក្រុមអ្នកសេដ្ឋកិច្ចមួយចំនួន បានរកឃើញថា ចំនួនក្រុមហ៊ុនដឹកជញ្ជូនអ្នកដំណើរធំៗដែលបានចុះបញ្ជីមាន ៦ក្រុមហ៊ុន ដែលក្រុមហ៊ុននីមួយៗមានឡានដឹកភ្ញៀវជាមធ្យមប្រមាណ ៣០គ្រឿង។ តួលេខនេះបញ្ជាក់ថា ក្រុមហ៊ុនដឹកជញ្ជូនអ្នកដំណើរទាំងអស់ អាចដឹកភ្ញៀវបានប្រមាណ ១ម៉ឺននាក់ក្នុងមួយជើង។
ដោយឡែកប្រជាពលរដ្ឋដែលរស់នៅទីក្រុងភ្នំពេញ និងឆ្លងកាត់ មានជាង ៣លាននាក់ ដែលភាគច្រើន ពួកគាត់ទាំងអស់តែងតែទៅលេងស្រុកកំណើតនៅពេលបុណ្យប្រពៃណីជាតិ ម្ដងៗ។ តែក្នុងចំណោមប្រជាពលរដ្ឋទាំងអស់នោះ ក៏មានមួយចំនួន ជ្រើសរើសមធ្យោបាយធ្វើដំណើរដោយខ្លួនឯងដែរ។
បន្ថែមលើនេះ ប្រជាពលរដ្ឋដែលរស់នៅភ្នំពេញមានជីវភាពធូរធារប្រមាណ ១លាននាក់ អាចប្រើប្រាស់ឡានរបស់ក្រុមគ្រួសាររបស់គេ នៅពេលធ្វើដំណើរទៅលេងស្រុកកំណើតម្ដងៗ។ ប៉ុន្តែប្រជាពលរដ្ឋប្រមាណ ២លាននាក់ផ្សេងទៀត នឹងជ្រើសរើសការធ្វើដំណើរតាមក្រុមហ៊ុនដឹកជញ្ជូនអ្នកដំណើរ ដែលពួកគាត់ប្រឈមការបង់ថ្លៃសេវាកម្មខ្ពស់។
អ្នកវិភាគសេដ្ឋកិច្ចបានលើកឡើងទៀតថា ការអន្តរាគមន៍របស់រដ្ឋាភិបាល ដើម្បីបញ្ចៀសការឡើងថ្លៃសំបុត្រសេវាដឹកអ្នកដំណើរ នៅពេលបុណ្យប្រពៃណីជាតិម្ដងៗនោះ អាចធ្វើឡើងតាមរយៈយន្តការសំខាន់បី គឺទីមួយ រដ្ឋាភិបាលត្រូវមានលុយចេញខាត ឬចូលរួមវិភាគទានដល់អ្នកធ្វើដំណើរ។ ទីពីរ ការលើកលែងពន្ធបង់ផ្លូវ ឬចំណត និងទីបី ការបញ្ចុះតម្លៃប្រេងសាំង៕ ប្រភព:rfa
