ខេត្តកំពត៖ សេចក្តីរាយការណ៍បឋមបានឲ្យដឹងនៅព្រឹកថ្ងៃទី១៨កញ្ញានេះថា កំណាត់ផ្លូវឡើងទៅរមណីយដ្ឋានភ្នំបូកគោ បានប្រេះស្រាំក្រោយពីមានភ្លៀងធ្លាក់ក្នុងរយៈពេលប៉ុន្មានថ្ងៃចុងក្រោយនេះ។
អ្នកដំណើរឡើងទៅកម្សាន្តលើកំពូលភ្នំបូកគោ បានថតរូបភាពផ្លូវប្រេះស្រាំនោះបង្ហោះក្នុង Facebook នៅរសៀលនេះ។
Facebookរបស់ឈ្មោះ “តាលតឆា” បានសរសេរ និងបង្ហោះរូបថតថា “ការធ្វើដំណើររបស់ក្រុមការងាររបស់យើង… ត្រូវបានខកខានមិនអាចបន្តដំណើរបាន ដោយមានឧបសគ្គខ្លះៗដោយហេតុតែផ្លូវឡើងទៅកាន់រមណីយដ្ឋានភ្នំបូកគោ មានការប្រេះស្រុតផ្លូវឡើង ទៅកាន់ភ្នំ។ ដូច្នេះសូមបងប្អូនដែលមានបំណងធ្វើដំណើរកាត់ទីតាំងខាងលើនេះ សូមប្រុងប្រយ័ត្ន ក្រែងលមានគ្រោះថ្នាក់”។
ករណីគ្រោះមហន្តរាយដោយធម្មជាតិខាងលើនេះ គួរតែអាជ្ញាធរពាក់ព័ន្ធរូតរះចុះទៅត្រួតពិនិត្យ និងជួសជុលកែលម្អបន្ទាន់ផង ឬក៏ប្រកាសជូនដំណឹងដល់សាធារណជន និងភ្ញៀវអន្តរជាតិប្រយោជន៍ឲ្យពួកគេបានដឹងពីស្ថានភាពដែលអាចបង្កគ្រោះថ្នាក់ខាងលើ នេះ៕ដោយ៖រដ្ឋា
