ភ្នំពេញ:ថ្មីៗនេះ ក្រសួងពាណិជ្ជកម្មបានដាក់បម្រាមកុំឲ្យបរិភោគ នំសូកូឡាដែលនាំចូលពីប្រទេសអង់គ្លេស ដោយសង្ស័យថាមានបាក់តេរី(Salmonella) ដែលអាចបង្កគ្រោះថ្នាក់ដល់សុខភាពជាយថាហេតុ។
កាលពីថ្ងៃទី១៨ ខែកញ្ញា កន្លងមកនេះ អគ្គនាយកដ្ឋានកាំកុងត្រូលនៃក្រសួងពាណិជ្ជកម្មកម្ពុជាបានឲ្យដឹងថា តាមទីភ្នាក់ងារស្តង់ដារផលិត ផលម្ហូបអាហារនៃចក្រភពអង់គ្លេស បានចេញផ្សាយព័ត៌មានពីក្រុមហ៊ុនជាម្ចាស់ផលិតផលនំសូកូឡាឈ្មោះ Atkins International BV ដែលបានស្ម័គ្រចិត្តប្រមូលយកមកវិញនូវផលិតផលនំសូកូឡា Atkins Endulge Chocolate Break Wafers របស់ខ្លួនពីទីផ្សារបន្ទាប់ពីមានការសង្ស័យអំពីលទ្ធភាពនៃការចម្លងចូលនៃបាក់តេរី Salmonella ដែលអាចបង្កគ្រោះ ថ្នាក់ដល់សុខភាព។
សេចក្តីជូនដំណឹងបានបង្ហាញច្បាស់ថា ផលិតផលនំរបស់ក្រុមហ៊ុន Atkins International BV ដែលត្រូវប្រមូលទៅវិញនោះរួមមាន Atkins Endulge Chocolate Break Wafers មានទម្ងន់ក្នុង១កញ្ចប់ : 3 wafers x 21.5g ហើយមានលេខឡូតិ៍ 5147 និងផុតកំណត់ប្រើប្រាស់ថ្ងៃ២៧ ខែសីហា ឆ្នាំ២០១៦។
យោងតាមការជូនដំណឹងនេះ ក្រសួងពាណិជ្ជកម្មកម្ពុជា បានអំពាវនាវដល់មន្ត្រីមានសមត្ថកិច្ច និងអាជីវកម្មករឲ្យមានការប្រុងប្រយ័ត្នខ្ពស់ និងរួមគ្នាទប់ស្កាត់គ្រោះថ្នាក់នេះ ព្រោះអាចប៉ះពាល់ដល់សុខភាពជាយថា ហេតុ។ ក្រសួងក៏អំពាវនាវចំពោះពាណិជ្ជករនាំចូល អាជីវករលក់ដុំ និងលក់រាយឈប់នាំចូល កុំចែកចាយបោះដុំ ឬលក់រាយបន្តទៀត និងផ្តល់ព័ត៌មានទៅសមត្ថកិច្ចកាំកុងត្រូលដែលនៅជិតបំផុត ឬតាមទូរស័ព្ទដែលអាចធ្វើទៅបាន ៕ដោយ:រដ្ឋា
ប្រភេទនំ សូកូឡា ដែលប្រទេសអង់គ្លេសប្រកាសថាអាចមានបាក់តេរីចម្លងមេរោគ
