ភ្នំពេញ៖ អ្នកជិះម៉ូតូម្នាក់ស្លាប់ និងអ្នករួមដំណើរម្នាក់បានរងរបួសធ្ងន់ ដោយសាររថយន្តស៊េរីទំនើបមួយគ្រឿងម៉ាក BMW បុករះម៉ូតូ និងបន្តទៅបុករថយន្តចំនួន៥គ្រឿងផ្សេងទៀតឲ្យរងការខូចខាតយ៉ាងដំណំ។ ហេតុការណ៍នេះកើតឡើងនៅវេលាម៉ោងជាង៩យប់ថ្ងៃទី២៧ ខែកញ្ញា ឆ្នាំ២០១៥ នៅមុខហាងបៃតងស្រស់ សង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានបានឲ្យដឹងថា មុនពេលកើតហេតុគេឃើញរថយន្តម៉ាកBMW ពណ៌ទឹកប្រាក់ ពាក់ស្លាកលេខ ភ្នំពេញ 2AE-9986 បើកបរដោយបុរសម្នាក់ធ្វើដំណើរយ៉ាងលឿន ពីទិសដៅលិចទៅកើត ខណៈមកដល់មុខហាងបៃតងស្រស់ ស្រាប់តែបុកអ្នកជិះម៉ូតូស្មាស់២នាក់អូសជាង៤០ម៉ែត្រ បណ្តាលឲ្យជនរងគ្រោះម្នាក់ឈ្មោះ ពន់ បញ្ញា អាយុ២៥ឆ្នាំស្លាប់ និងម្នាក់ទៀតរងរបួសធ្ងន់។
ប្រភពបន្តថា ក្រោយបុកអ្នកជិអម៉ូតូហើយ រថយន្តបង្កបានជ្រុលទៅបុករថយន្តឡង់គ្រីស័រមួយគ្រឿង ពាក់ស្លាកលេខសៀមរាប 2A-2150 ដោយមានម៉ូតូមួយគ្រឿងនៅពីក្រោម រួចហើយរថយន្តបង្កបានជ្រុលទៅបុករថយន្តកាមរីមួយគ្រឿងពាក់ស្លាកលេខ ភ្នំពេញ 2U-5568 រួចបានទៅបុករថយន្ត កាមរី នាឡែនមួយគ្រឿងទៀតពាក់ស្លាកលេខ ភ្នំពេញ 2AD-0633 បណ្តាលឲ្យរងការខូចខាតយ៉ាងខ្លាំង។
ក្រោយកើតហេតុសពជនរងគ្រោះមិនត្រូវរថយន្តពេទ្យណាមកដឹកយកទៅនោះឡើយ ដោយទុកសពនៅកណ្តាលផ្លូវតែម្តង។ ទោះជាយ៉ាងណានៅមិនមានការបង្ហាញអត្តសញ្ញាណអ្នកបើករថយន្តបង្កនៅឡើយទេ ៕
