ប៉ារីស៖លោកនាយករដ្ឋមន្ត្រី ហ៊ុន សែន កាលពីល្ងាចថ្ងៃទី២៥ តុលា បានជួបសំណេះសំណាលជាមួយប្រជាពលរដ្ឋខ្មែរ និងនិស្សិតកម្ពុជា ដែលកំពុងរស់នៅក្នុងប្រទេសបារាំង ជាងមួយពាន់នាក់ ។ ក្នុងនោះ លោកនាយករដ្ឋមន្ត្រី ហ៊ុន សែន បានប្រកាសទាមទារឲ្យលោក សម រង្ស៊ី ត្រូវតែសុំទោសលោកសាធារណៈ ។
គួរជម្រាបថា លោកនាយករដ្ឋមន្ត្រីហ៊ុន សែន កាលពីល្ងាចថ្ងៃអាទិត្យ បានជួបសំណេះសំណាលជាមួយនិស្សិត និងប្រជាពលរដ្ឋខ្មែរ រស់នៅក្នុងប្រទេសបារាំង។ វត្តមានរបស់លោកប្រមុខរដ្ឋាភិបាលកម្ពុជា បានទទួលទាំងពីខាងអ្នកគាំទ្រ និងក្រុមប្រឆាំងដែលបានធ្វើបាតុកម្មនៅច្រកផ្លូវចូលទៅកាន់អគារ Maison de la Chimie ជាទីដែល លោកហ៊ុន សែនបាននិយាយជាង២ម៉ោង ទៅកាន់ប្រជាជនខ្មែរ នៅប្រទេសបារាំង។ខណៈលោកនាយករដ្ឋមន្ត្រី ហ៊ុន សែន កំពុងបំពេញទស្សនកិច្ចនៅប្រទេសបារាំង ចាប់ពីថ្ងៃទី២៥ ដល់ថ្ងៃទី២៧ ខែតុលា នេះ លោក សម រង្ស៊ី ប្រធានគណបក្សសង្គ្រោះជាតិ ក៏កំពុងស្ថិតនៅប្រទេសបារាំងនោះដែរ។
សំណេរក្នុងហ្វេសប៊ុក ផ្លូវការរបស់នាយករដ្ឋមន្ត្រី ហ៊ុន សែន បានលើកឡើងថា លោកតែងតែគោរពស្រឡាញ់សិស្ស និស្សិត និងបងប្អូនប្រជាពលរដ្ឋខ្មែរ ទោះបីបានភៀសខ្លួនទៅរស់នៅទីណាក៏ដោយ ធ្លាប់បានជួយឧបត្ថម្ភថវិកាមួយចំនួនដល់សិស្សនិស្សិតដែលកំពុងសិក្សានៅប្រទេសបារាំងផងដែរ។
សំណេរដដែលបន្តថា លោកក៏បានប្រាប់ប្អូនខ្មែរនៅបារាំងអំពីគំនិត និងផែនការមិនស្មោះត្រង់របស់បក្សប្រឆាំងដែលមានបំណងព្យាបាទមកលើរូបលោក។ លោកថា ចំពោះមេបក្សប្រឆាំង សម រង្សី គឺត្រូវធ្វើការសូមទោសជាសាធារណៈ ចំពោះទង្វើដែលខ្លួនបានប្រព្រឹត្តមកលើរូបលោក នោះទើបសង្ឃឹមថាទំនាក់ទំនងនយោបាយអាចឈានមករកភាពប្រក្រតីវិញបាន។
លោកនាយករដ្ឋមន្ត្រី ហ៊ុន សែន បន្តថា លោកមានការសោកស្តាយយ៉ាងខ្លាំង ដែលបក្សប្រឆាំងតែងតែបង្កអោយមានបញ្ហាជាច្រើន ជាពិសេសបាតុកម្មដែលធ្វើអោយបរទេសមើលងាយខ្មែរ ធ្វើអោយប៉ះពាល់ដល់ផលប្រយោជន៍ជាតិ។
លោកនាយករដ្ឋមន្ត្រី ហ៊ុន សែន គូសបញ្ជាក់ថា ទង្វើរបស់បក្សប្រឆាំងទោះជាដោយចេញមុខផ្ទាល់ ឬដោយប្រយោល រួមទាំងផលប៉ះពាល់នានា ដែលនឹងកើតមានឡើង គឺបក្សប្រឆាំងខ្លួនឯងត្រូវទទួលខុស ត្រូវដោយខ្លួនឯង មិនអាចជួយពួកគេបានតទៅទៀតឡើយ៕ដោយ៖ខេមរា
