ភ្នំពេញ៖ ប្រធានគណបក្សសង្គ្រោះជាតិលោក សម រង្ស៊ី អាចប្រឈមនឹងការចាប់ខ្លួនពាក់ព័ន្ធសំណុំរឿងលោក ហុង សុខហួរ គ្រាដែលលោកសមរង្ស៊ីបានឲ្យលោក ហុង សុខហួរ បង្ហោះឯកសារក្លែងក្លាយនៅក្នុងFacebook របស់ខ្លួន។ នេះបើយោងតាមការថ្លែងរបស់លោកនាយករដ្ឋមន្ត្រី ហ៊ុន សែន ពេលជួបសំណេះសំណាលជាមួយប្រជាពលរដ្ឋ និងនិស្សិតនៅប្រទេសបារាំង កាលពីថ្ងៃទី២៥ ខែតុលានេះ ។
នាយករដ្ឋមន្ត្រី ហ៊ុន សែន បានថ្លែងថា ករណីលោក ហុង សុខហួរ គឺជាបទល្មើសជាក់ស្តែងដែលសមត្ថកិច្ចត្រូវចាប់ខ្លួនដោយមិនចាំបាច់មានការដកអភ័យឯកសិទ្ធិនោះឡើយ ។ ចំណែកលោក សម រង្ស៊ី អាចនឹងមានទោសដោយសារតែបានផ្តល់កន្លែងចែកចាយឯកសារក្លែងក្លាយ ។
លោកនាយករដ្ឋមន្ត្រីបានបញ្ជាក់ថា លើកនេះឈប់លើកលែងទោសឲ្យហើយ ព្រោះលោកធ្លាប់បានលើកលែងទោសឲ្យម្នាក់នេះ២ដងរួចមកហើយ ហើយគុកព្រៃស អត់មានទទួលស្គាល់ថា អ្នកណាជាស្អីនោះទេ ។ លោក ហ៊ុន សែន បានសង្កត់ធ្ងន់ថា លោកនិយាយដូច្នេះ មិនមែនអាង គុក អាងច្រវ៉ាក់ អាងទាហាន អាងប៉ូលីស អាងអំណាចនោះទេ ប៉ុន្តែគឺសំអាងលើផ្លូវច្បាប់ ។
គួរបញ្ជាក់ថា លោក ហុង សុខហួរ ត្រូវបានសមត្ថកិច្ចចាប់ខ្លួន និងឃុំខ្លួនបណ្តោះអាសន្ននៅពន្ធនាគារព្រៃស តាមបទចោទប្រកាន់៣ករណី ទី១/ ក្លែងឯកសារសាធារណះ ទី២/ ប្រើប្រាស់ឯកសារសាធារណះក្លែងក្លាយ ទី៣/ ញុះញង់បង្កឲ្យមានភាពវឹកវរធ្ងន់ធ្ងរ ដល់សន្តិសុខជាតិ៕
