ច្រកបឹងត្រកួនស្ថិតក្នុងស្រុកថ្មពួក ខេត្តបន្ទាយមានជ័យ ជារៀងរាល់ថ្ងៃ គេសង្កេតឃើញ ម៉ូតូចូលតាមប្រទេសថៃត្រូវបានដឹកជញ្ជូនដាក់លើរថយន្ត រាប់រយគ្រឿងក្នុងមួយថ្ងៃៗឆ្លងកាត់ច្រកព្រំដែនបឹងត្រកួន ដែលគេដឹងថាម៉ូតូទាំងនោះបង់ពន្ធមិនគ្រប់ ឬមួយចំនួនមិនបង់ពន្ធតែម្ដង។

ប្រភពពីមន្ត្រីយោធាព្រំដែនម្នាក់ដែលសុំលាក់អត្តសញ្ញាណ បានឲ្យដឹងថា បើគ្មានការត្រូវរ៉ូវឃុបឃិតពីប្រធានគយ ច្រកនោះទេ ម៉ូតូថៃទាំងនោះមិនអាចឆ្លងដែនចូលក្នុងទឹកដីខ្មែរបានឡើយ។ ក្រៅពីនេះគេសង្កេតឃើញមានទំនិញខូចគុណភាព នៅតែបន្តនាំចូលជារៀងរាល់ថ្ងៃដដែល។ ប្រជាពលរដ្ឋសង្កេតឃើញតែសមត្ថកិច្ច ដុតបំផ្លាញសាច់បង្កកខូចគុណភាពរាប់សិបតោនក្នុង១សប្តាហ៍ៗមិនដែលខកខាននោះឡើយ។ សំណួររបស់ប្រជាពលរដ្ឋនៅកណ្ដាលផ្ទៃប្រទេស បានចោទសួរថា តើទំនិញខូចគុណភាពដូចជាសាច់បង្កក, ជើងមាន់,ជើងទា,គ្រឿងក្នុងជ្រូកបង្កកខូចគុណភាពជាដើម ចូលតាមច្រកណា ហេតុអ្វីបានជាសមត្ថកិច្ចច្រកព្រំដែន មិនបង្ក្រាប ? ប្រភពបានរាយការណ៍ឲ្យដឹងថា គ្រាន់តែច្រកព្រំដែនបឹងត្រកួនស្រុកថ្មពួក ខេត្តបន្ទាយមានជ័យសមត្ថកិច្ចជំនាញ គយបានបើកច្រកឲ្យទំនិញខូច គុណភាពចូលរាល់យប់។

ប្រភពបានឲ្យដឹងទៀតថា ក្រៅពីទំនិញខូចគុណភាពដែលជាប្រភេទសាច់បង្កកនិងគ្រឿងក្នុងជាដើមនោះ ក្រុមឈ្មួញគ្រាក់ៗនៅតែអាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកបឹងត្រកួន។ ការ ដែលពួកឈ្មួញទាំងនោះអាចដឹកជញ្ជូនទំនិញ ទៅដល់គោលដៅ គឺមានការឃុបឃិតបិទភ្នែក ពីក្រុមមន្រ្តីគយចល័តខេត្តបន្ទាយមានជ័យ និងគយចល័តតំបន់៥ ផ្លូវជាតិលេខ៥ បោះទីតាំងនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ផងដែរ។ តាមច្រករបៀង ក្បែរៗច្រកទ្វារតំបន់បឹងត្រកួន នៅតែមានឈ្មួញនាំចូលទំនិញខុសច្បាប់និងទំនិញគេចពន្ធ ដោយ មានការបើកភ្លើងខៀវពីលោកមេគយច្រកបឹងត្រកួន និងសមត្ថកិច្ចពាក់ព័ន្ធមួយចំនួន។

ប្រភពឃើញផ្ទាល់ភ្នែកអះអាងថា ម៉ូតូស៊េរីទំនើបមានដូចជាម៉ាកហុងដាស្កូពីនិង ហុងដា c125..ជាប្រភេទម៉ូតូត្រូវប៉ាន់បំផុតនៅក្នុងប្រទេសពួកឈ្មួញកំពុងនាំចូលតាមច្រកព្រំដែនបឹងត្រកួន។ ប្រភពបានបន្ថែមថា ម៉ូតូភាគច្រើនដែលប្រើប្រាស់នៅបណ្ដាខេត្តភាគខាងលិច រួមទាំងក្រុងភ្នំពេញផង មិនមានការបង់ពន្ធត្រឹមត្រូវក៏ដោយសារតែការនាំចូលតាមច្រកបឹងត្រកួននេះឯង។ ប្រភពបានរាយការណ៍ថា គេអាចមើលឃើញដោយផ្ទាល់ភ្នែកជារៀងរាល់ថ្ងៃ ចំពោះសកម្មភាពនៃការនាំម៉ូតូបង់ពន្ធមិនគ្រប់ឬមិនបង់ពន្ធតែម្ដង តាមច្រកបឹងត្រកួននេះឯង។

ក្រៅអំពីម៉ូតូមិនបង់ពន្ធទាំងនោះ ក៏នៅមានទំនិញគេចពន្ធ ចូលតាមច្រកព្រំដែនបឹងត្រកួននេះ ជារៀងរាល់ថ្ងៃផងដែរ។ បញ្ហាម៉ូតូមិនបង់ពន្ធនេះ វាជាប្រភពហិរញ្ញវត្ថុដ៏ផ្អែមរបស់លោកមេគយច្រកបឹងត្រកួន និងមន្ត្រីពាក់ព័ន្ធនៅតាម
ស្ថាប័នមួយចំនួនទៀត នៅច្រកព្រំដែនបឹងត្រកួននេះ។

បច្ចុប្បន្នរដ្ឋបាលខេត្តបន្ទាយមានជ័យ ហាក់ដូចជាធ្វើ មិនដឹងមិនឮ ចំពោះបញ្ហាដែលជាចំណុចអសកម្មកំពុងកើតឡើងនៅច្រកព្រំដែនបឹងត្រកួននេះ។ ដូច្នេះវាកាន់ តែផ្តល់ឱកាសឲ្យលោកមេគយ បិទភ្នែកផ្ដល់ឱកាសឲ្យពួកឈ្មួញនាំចូល
ម៉ូតូស៊េរីទំនើបពីប្រទេសថៃដោយសេរី។ ប្រជាពលរដ្ឋដែលឃើញទិដ្ឋភាពនេះបានត្រឹមនាំគ្នាឆ្ងល់ថា ហេតុអ្វីបានជាលោកមេគយច្រកបឹងត្រកួននេះមាន អំណាចខ្លាំងម៉្លេះ។ក្នុងការអនុញ្ញាតឲ្យឈ្មួញនាំម៉ូតូចូលដល់មិនបង់ពន្ធឬបងពន្ធមិនគ្រប់ដូចសព្វថ្ងៃនេះ៕

សូមចុច Link ដើម្បីទស្សនាព័ត៌មានពិស្ដារ៖ https://youtu.be/2DNxkMVqv7Q