ភ្នំពេញ៖នៅម៉ោងជិត ១០ យប់ថ្ងៃទី២៦ ខែវិច្ឆិកា នេះ ចរន្តអគ្គិសនី និងទឹកស្អាត នៅក្នុងរាជធានីភ្នំពេញ បានដាច់គ្រប់តំបន់ទាំងអស់។ ក្រៅពីដាច់ចរន្តអគ្គិសនី និងដាច់ទឹក នៅទូទាំងរាជធានីភ្នំពេញ នាយប់ទី៣ ថ្ងៃទី២៦ ខែវិច្ឆិកា នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នេះនៅខេត្តមួយចំនួនទៀតក៏ដាច់ភ្លើងដូចគ្នាដែរ។
នៅពេលដាច់ភ្លើងដូច្នេះ អ្នកដែលទៅទស្សនាកម្សាន្តនៅមាត់ទន្លេ និងតំបន់កម្សាន្តមួយចំនួនក្នុងឱកាសបុណ្យអុំទូកថ្ងៃទី៣នេះ ក៏បានវិលត្រលប់មកកាន់ផ្ទះសម្បែងវិញរៀងៗខ្លួនក្នុងអារម្មណ៍ងឿងឆ្ងល់។
លោក កែវ រតនៈ អគ្គនាយកអគ្គិសនីកម្ពុជា បានប្រាប់ភ្លាមៗក្រោយពេលភ្លើងដាច់ថា ការដាច់ភ្លើងនៅភ្នំពេញ និងនៅខេត្តមួយចំនួននោះ ដោយសារតែដាច់តង់ស្យុង នៅប្រទេសវៀតណាម ព្រោះកម្ពុជាយើង ភ្ជាប់ភ្លើងមកពីវៀតណាម។
រហូតដល់វេលាម៉ោងប្រហែល ១០និង ៣០ នាទីយប់ថ្ងៃដដែល នៅតំបន់មួយចំនួននៅភ្នំពេញ គឺមានភ្លើង និងទឹកស្អាតប្រើប្រាស់វិញដោយកន្លែងខ្លះៗហើយ។
សូមបញ្ជាក់ ថា ក្រៅពីនៅភ្នំពេញ នៅខេត្តមួយចំនួនទៀត ដូចជា ខេត្តកណ្តាល ខេត្តតាកែវ ខេត្តពោធិ៍សាត់ ខេត្តបាត់ដំបង និងខេត្តបន្ទាយមានជ័យ ក៏បានដាច់ភ្លើងអគ្គិសនី ព្រមៗគ្នាផងដែរ ដូចទៅនឹងការអះអាងបញ្ជាក់របស់លោក កែវ រតនៈ អគ្គនាយកអគ្គិសនីកម្ពុជានោះមែន។
នេះជាលើកទីមួយហើយដែលនៅរាជធានីភ្នំពេញ និងខេត្តមួយចំនួនបានដាច់ចរន្តអគ្គិសនី និងទឹកស្អាត ធ្វើឲ្យប្រជាពលរដ្ឋមានការងឿងឆ្ងល់ និងបារម្ភយ៉ាង ខ្លាំងពីសុវត្ថិភាពព្រោះភ្លាមៗនោះប្រជាពលរដ្ឋមិនបានទទួល ដំណឹងគួរឲ្យស្ងប់ចិត្តពី សំណាក់ អាជ្ញាធរមានសមត្ថកិច្ចឡើយ។ករណី នេះ ក៏ជាមេរៀនដ៏សំខាន់មួយសម្រាប់ជាការត្រៀមបម្រុងជាមុនរបស់អាជ្ញាធរខេត្ត -ក្រុង ខណៈចរន្តអគ្គិសនីដែលបានភ្ជាប់មកពីប្រទេសវៀតណាមត្រូវបានផ្តាច់ដោយប្រការណាមួយ៕ដោយ៖រដ្ឋា
