ភ្នំពេញ៖លោកនាយករដ្ឋមន្ត្រី ហ៊ុន សែន បានថ្លែងបញ្ជាក់ថា ការដាច់ចរន្តអគ្គិសនីស្ទើរទូទាំងប្រទេសនៅយប់ថ្ងៃព្រហស្បតិ៍ទី ២៦ នេះ គឺមិនមែនជាចេតនានយោបាយ ឬជាការវាយប្រហារភេរវកម្មនោះទេ គឺដោយសារតែការដាច់ចរន្តនៅប្រទេសវៀតណាមដែលជាប្រភពអគ្គិសនីរបស់កម្ពុជា។
លោកនាយករដ្ឋមន្ត្រី ហ៊ុន សែន បានធ្វើការថ្លែងបែបនេះ តាមរយៈវីដេអូឃ្លីប លើទំព័រហ្វេសប៊ុកផ្លូវការរបស់លោក បន្ទាប់ពីចរន្តអគ្គិសនី និងទឹកស្អាត បានដាច់ស្ទើរទូទាំងប្រទេស។
លោក ហ៊ុន សែន មានប្រសាសន៍បញ្ជាក់ថា “នេះមិនមែនជាចេតនានយោបាយរបស់ក្រុមណាមួយ ឬក៏មិនមែនជាឧប្បតិវហេតុដែលអាចកើតឡើងនូវការវាយប្រហារភេរវកម្មនោះទេ”។ លោកបន្តថា ការដាច់នេះគឺបណ្ដាលមកពីការដាច់ចរន្តនៅប្រទេសវៀតណាម។
នៅម៉ោងជិត ១០ យប់ថ្ងៃទី២៦ ខែវិច្ឆិកា នេះ ចរន្តអគ្គិសនី និងទឹកស្អាត នៅក្នុងរាជធានីភ្នំពេញ បានដាច់គ្រប់តំបន់ទាំងអស់។ ក្រៅពីដាច់ចរន្តអគ្គិសនី និងដាច់ទឹក នៅទូទាំងរាជធានីភ្នំពេញ នាយប់ទី៣ ថ្ងៃទី២៦ ខែវិច្ឆិកា នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នេះនៅខេត្តមួយចំនួនទៀតក៏ដាច់ភ្លើងដូចគ្នាដែរ។
នៅពេលដាច់ភ្លើងយ៉ាងដូច្នេះ អ្នកដែលទៅទស្សនាកម្សាន្តនៅមាត់ទន្លេ និងតំបន់កម្សាន្តមួយចំនួនក្នុងឱកាសបុណ្យអុំទូកថ្ងៃទី៣នេះ ក៏បានវិលត្រលប់មកកាន់ផ្ទះសម្បែងវិញរៀងៗខ្លួនក្នុងអារម្មណ៍ ងឿងឆ្ងល់។
លោកនាយករដ្ឋមន្ត្រីក៏បានសុំអភ័យទោសពីប្រជាពលរដ្ឋផងដែរ ដោយនេះគឺជាឧប្បត្តិហេតុដែលឥតព្រាងទុក៕ដោយ៖រដ្ឋា
