ខេត្តកំពត៖កាលពីថ្ងៃទី២១ ខែធ្នូ ឆ្នាំ២០១៥ ខេត្តកំពតមានបើកអង្គសិក្ខាសាលាមួយស្តីពីការផ្សព្វផ្សាយរបាយការណ៍លទ្ធផលចុងក្រោយនៃអង្កេតប្រជាសាស្ត្រ និងសុខភាពកម្ពុជាឆ្នាំ២០១៤ នៅថ្នាក់ក្រោមជាតិ ។
អង្គសិក្ខាសាលានេះមានរយះពេលពីរថ្ងៃរៀបចំឡើងដោយវិទ្យាស្ថានជាតិស្ថិតិក្រសួងផែនការ សហការជាមួយក្រសួងសុខាភិបាលមានអ្នកចូលរួមជាមន្ត្រីមកពីមន្ទីរផែនការនិងមន្ទីរសុខាភិបាលខេត្តចំនួន៩ គឺខេត្តកំពត កែប កំពង់ស្ពឺ ព្រះសីហនុ កោះកុង តាកែវ កណ្តាល កំពង់ចាម និងខេត្តកំពង់ឆ្នាំងព្រមទាំងមន្ត្រីនៃមន្ទីរអង្គភាពនានាក្នុងខេត្តកំពតសរុបជាង១០០នាក់ ក្រោមអធិបតីភាពចូលរួមឯ.ឧ ឆាយ-ថន ទេសរដ្ឋមន្ត្រីរដ្ឋមន្ត្រីក្រសួងផែនការ និងឯ.ឧ ខូយ ឃុនហ៊ួរ អភិបាលខេត្ត។
បន្ទាប់ពីឯ.ឧ ខូយ ឃុនហ៊ួរ បានថ្លែងសុន្ទរកថាស្វាគមន៍អោយដឹងអំពីសមិទ្ធិផលរីកចម្រើនរបស់ខេត្តកំពតរួចមក លោកជំទាវ ហង់ លីណា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយកវិទ្យាស្ថានជាតិស្ថិតិក្រសួងផែនការបានឡើងមានប្រសាសន៍ថា ការអង្កេតប្រជាសាស្ត្រ និងសុខភាពកម្ពុជាបានអនុវត្តចំនួន៤លើករួចមកហើយ រួមទាំងលើកនេះ ហើយការអនុវត្តនេះ ត្រូវបានរៀបចំអនុវត្តជារៀងរាល់៥ឆ្នាំម្តង។ដោយឡែកសម្រាប់ឆ្នាំ២០១៤ការធ្វើអង្កេតនេះបានគ្របដណ្តប់ទៅលើគ្រួសារចំនួន ១៥.៩៣៧គ្រួសារ ចំនួនស្ត្រី និងបុរសគោលដៅដែលមានអាយុពី ១៥ដល់៤៩ឆ្នាំ ក្នុងនោះសម្រាប់សម្ភាសន៍មានស្ត្រីចំនួន១៧.៥៧៨នាក់ និងបុរស៥.១៩០នាក់។
ឯ.ឧ ទេសរដ្ឋមន្ត្រី ឆាយ ថន បានមានប្រសាសន៍អោយដឹងផងដែរថា តាមរយះការអង្កេតប្រជាសាស្ត្រ និងសុខភាពលម្ពុជាឆ្នាំ២០១៤បានបង្ហាញអោយឃើញថារាជរដ្ឋាភិបាលកម្ពុជាក្រោមការដឹកនាំដោយសម្តេចតេជោ ហ៊ុន សែនបានសម្រេចសមិទ្ធិផលគួរអោយកត់សម្គាល់ក្នុងផែនការយុទ្ធសាស្ត្រវិស័យសុខាភិបាលជាពិសេសស្ថានភាពសុខភាបប្រជាជនពាក់ព័ន្ធស្ត្រី ទារក កុមារ ។ ឯកឧត្តមទេសរដ្ឋមន្ត្រីក៏បានចាត់ទុកលទ្ធផលការអង្កេតពិតជាមានសារៈសំខាន់ ហើយត្រូវបានប្រើប្រាស់ដ៏ទូលំទូលាយ និងជាមូលដ្ឋានសម្រាប់បម្រើ អោយការរៀបចំគោលនយោបាយយុទ្ធសាស្ត្ររបស់រាជរដ្ឋាភិបាល និងជាឧបករណ៍សម្រាប់តាមដាន និងវាយតម្លៃអំពីវឌ្ឍនភាពនៃការអនុវត្តគោលនយោបាយទាក់ទងនឹងការអភិវឌ្ឍ សង្គមកិច្ចកម្ពុជា។
លទ្ធផលនេះក៏បម្រើអោយការវាស់វែងការសម្រេចបានការអនុវត្ត គោលដៅអភិវឌ្ឍន៍សហសវត្ស និងគោលដៅអភិវឌ្ឍប្រកបដោយចីរភាពក្រោយឆ្នាំ២០១៥ ព្រមទាំងជួយដល់ការសិក្សាស៊ីជម្រៅ និងបម្រើអោយយុទ្ធសាស្ត្រកាត់បន្ថយភាពក្រីក្ររបស់រាជរដ្ឋាភិបាលផងដែរផងដែរ៕ដោយ៖ អ.វ៉ឹង
