បាល់ទាត់៖Gareth Bale ខ្សែបម្រើឆ្នើមក្រុម Real Madrid បានបន្តកុងត្រា៦ឆ្នាំទៀតជាមួយក្រុមស្ដេចស រហូតដល់ឆ្នាំ២០២២ និងទទួលបានថ្លៃឈ្នួលច្រើនជាងមុន។ នេះបើយោងតាមសារព័ត៌មាន Daily mail ។
កុងត្រាថ្មីនេះមានន័យថា Super Star ជម្រើសជាតិវែលរូបនេះ នឹងលេងនៅក្លិបយក្សនៅអេស្ប៉ាញមួយនេះរហូតដល់អាយុ៣៣ឆ្នាំ និងទទួលបានថ្លៃឈ្នួល ៣៤៦០០០ផោនក្នុង១សប្ដាហ៍ ឬ១៨លានផោនក្នុង១ឆ្នាំ ដែលជាថ្លៃឈ្នួលថ្លៃបំផុតលំដាប់ទី២ បន្ទាប់ពី CR7 ១៩លានផោនក្នុង១ឆ្នាំ។
គួរបញ្ជាក់ថា Bale ផ្ទេរពីក្លឹប Tottenham Hotspur ទៅ Real កាលឆ្នាំ២០១៣ តម្លៃ៨៥លានផោន និងបង្ហាញខ្លួន១៣៥ប្រកួត ស៊ុត៦២គ្រាប់ Assists ៤៨ដង ជួយឲ្យក្រុមស្ដេចស លើកពាន UEFA Champions League ២ដង (២០១៤, ២០១៦), Copa del Rey (២០១៤), UEFA Supercup (២០១៤) និង FIFA Club World Cup (២០១៥) ផងដែរ៕
