បាល់ទាត់៖ខ្សែប្រយុទ្ធដ៏ឆ្នើមរបស់ក្រុជម្រើសជាតិអាល្លឺម៉ង់កីឡាករ Miroslav Klose បានប្រកាសចូលនិវត្តន៍ ពីអាជីពជាកីឡាករបាល់ទាត់ហើយក្រោយចប់កុងត្រាជាមួយក្រុម Lazio រដូវកាល២០១៥-១៦។
កីឡាករវ័យ៣៨ឆ្នាំរូបនេះបានសម្រេចចិត្តចូលនិវត្តន៍ ព្យួរស្បែកជើងតែម្ដង ហើយរូបគេនឹងទៅធ្វើការឲ្យក្រុមជម្រើសជាតិអាល្លឺម៉ង់ ក្រោមការដឹកនាំដោយគ្រូបង្វឹក Joachim Low និងអ្នកចាត់ការកីឡា Hansi Flick ក្នុងគោលបំណង ដើម្បីសិក្សារៀនសូត្រចង់ក្លាយជាគ្រូបង្វឹក នាពេលអនាគត។
Klose បង្ហាញខ្លួនឲ្យអាល្លឺម៉ង់ សរុប១៣៧ប្រកួត ស៊ុតបាន ៧១គ្រាប់ ច្រើនដាច់គេក្នុងប្រវត្តិសាស្ត្រក្រុមអាល្លឺម៉ង់ និងជួយឲ្យអាល្លឺម៉ង់ លើកពាន World Cup 2014, ទទួលបានជើងឯករង World Cup 2002។ ជាពិសេសវីរបុរសក្រុមអាល្លឺម៉ង់រូបនេះ គឺជា Top Scorer ក្នុងប្រវត្តិសាស្ត្រ World Cup ផងដែរ ដោយស៊ុតសរុបបាន ១៦គ្រាប់ ក្នុងការបង្ហាញខ្លួន ៤សម័យកាល និងលើ Ronaldo វីរបុរសប្រេស៊ីល១គ្រាប់។
គួរបញ្ជាក់ថា Klose ចាប់ផ្ដើមអាជីពជាកីឡាករបាល់ទាត់ដំបូង ជាមួយក្រុម Homburg និងធ្លាប់លេងឲ្យក្រុម Kaiserslautern, Werder Bremen, Bayern Munich និង Lazio ផងដែរ៕
