ដោយ៖ប៉ែន សុផល
បាត់ដំបង៖អាជ្ញាធរខេត្តបាត់ដំបង នៅព្រឹកថ្ងៃទី១៥ ខែធ្នូ ឆ្នាំ២០១៦នៅក្នុងបរិវេណសួនច្បារនាគបាញ់ទឹកបានប្រារព្ធទិវាប្រឆាំងអំពើជួញដូរមនុស្ស១២ធ្នូ ក្រោមប្រធានបទ “រាជរដ្ឋាភិបាលបាននិងកំពុងយកចិត្តទុកដាក់ខ្ពស់ក្នុងការការពារប្រជាពលរដ្ឋនិងប្រទេសជាតិពីភាពរងគ្រោះដោយឧក្រិដ្ឋជនជួញដូរមនុស្ស ធ្វើអាជីវកម្ម និងទារុណកម្ម”។ ពិធីនេះប្រព្រឹត្តទៅ ក្រោមវត្តមានលោកជំទាវ ញ៉ឹក សុគន្ធ អភិបាលរងនៃគណៈអភិបាលខេត្តបាត់ដំបងនិងជាអនុប្រធានអចិន្ត្រៃយ៍ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តបាត់ដំបង និងលោក លោកស្រី សិស្សានុសិស្សចូលរួមសរុប១០១៧នាក់។
លោកជំទាវ ញ៉ឹក សុគន្ធ បានថ្លែងក្នុងឱកាសនោះថា៖ទិវាជាតិប្រយុទ្ធប្រឆាំងការជួញដូរមនុស្សត្រូវបានរាជរដ្ឋាភិបាលកម្ពុជាកំណត់យកថ្ងៃទី១២ ខែធ្នូរៀងរាល់ឆ្នាំហើយគិតមកដល់ឆ្នាំ២០១៦នេះគឺជាឆ្នាំទី១០នៃការប្រារព្ធទិវាជាតិនេះ។ហើយរាជរដ្ឋាភិបាលបាននិងកំពុងយកចិត្តទុកដាក់យ៉ាងខ្លាំងក្នុងការការពារប្រជាពលរដ្ឋនិងប្រទេសជាតិពីភាពរងគ្រោះទាំងឡាយដែលបង្កឡើងដោយឧក្រិដ្ឋជនជួញដូរមនុស្សដែលបានធ្វើ អាជីវកម្ម ទារុណកម្ម និងកេងប្រវ័ញ្ចលើមនុស្សតាមគ្រប់រូបភាព ។
លោកជំទាវបន្តថា៖អំពើជួញដូរមនុស្ស គឺជាឧក្រិដ្ឋកម្មដ៍រ៉ាំរ៉ៃមួយក្នុងចំណោមឧក្រិដ្ឋកម្មដ៍ទៃទៀតដែលកើតមាននៅគ្រប់បណ្តាប្រទេសក្នុងពិភពលោក និងបានធ្វើអោយប៉ះពាល់ដល់សន្តិសុខមនុស្សនិងប្រទេសជាតិ។
ក្នុងនោះផងដែរក្នុងនាម រដ្ឋបាលខេត្តបាត់ដំបងលោកជំទាវបានប្តេជ្ញាចឹត្តពង្រឹងកិច្ចសហប្រតិបត្តិការរវាងស្ថាប័ន និងដៃគូពាក់ព័ន្ធ ទ្វេភាគី និងពហុភាគីទទួលខុសត្រូវដើម្បីដោះស្រាយបញ្ហាដែលនាំអោយមានការជួញដូរ កេងប្រវ័ញ្ចទៅលើពលកម្មកុមារ។ ពង្រឹងវិធានការគ្រប់គ្រងលំហូរចេញ ចូល តាមព្រំដែនរវាងព្រះរាជាណាចក្រកម្ពុជានិងប្រទេសជិតខាង រួមគ្នាបង្ការ ទប់ស្កាត់អំពើជួញដូរមនុស្សនិងពលកម្មលើកុមារគ្រប់រូបភាព។ ការពារសិទ្ធិ និងផលប្រយោជន៍ស្របច្បាប់របស់ជនរងគ្រោះ ដោយកំណត់អត្តសញ្ញាណអោយបានជាក់លាក់ ជៀសវាងការបន្លំ បោកប្រាស់ពីឧក្រិដ្ឋជន ក្នុងគោលដៅបង្វែរបទល្មើស។ ពង្រឹងកិច្ចសហការជាមួយបណ្តាប្រទេសពាក់ព័ន្ធ ក្នុងការស៊ើបអង្កេតបទល្មើស ជួញដូរមនុស្ស ការអនុវត្តច្បាប់ដើម្បីកាត់ទោសលើឧក្រិដ្ឋកម្មជួញដូរមនុស្ស។ ពង្រឹងវិធានការគ្រប់គ្រង ត្រួតពិនិត្យសកម្មភាពជ្រើសរើស បណ្តុះបណ្តាលនិងបញ្ជូនពលកររបស់ទីភ្នាក់ងារ ក្រុមហ៊ុនឯកជន អង្គការឬសមាគម សាលាភាសាបរទេស ដែលបាននិងកំពុងតែធ្វើសកម្មភាពយ៉ាងអាណាធិបតេយ្យ ក្នុងការផ្សព្វផ្សាយទាក់ទាញកម្លាំងយុវជនអោយចំណាយក្នុងការចុះឈ្មោះ និងបញ្ជូនទៅក្រៅប្រទេសដោយមិនមានការទទួលខុសត្រូវ និងពង្រឹងការអនុវត្តច្បាប់ អោយរឹតតែម៉ឺងម៉ាត់ដើម្បីនាំយកជនល្មើសមកផ្តន្ទាទោសតាមទំហំនៃការប្រព្រឹត្ត និងផ្តល់យុត្តិធម៌ជូនជនរងគ្រោះ៕
