ភ្នំពេញ៖យុវជនម្នាក់ត្រូវក្រុមក្មេងស្ទាវមួយក្រុមនាំគ្នាដេញចាក់ និងកាប់ បណ្តាលអោយរងរបួសធ្ងន់ហើយស្លាប់បាត់បង់ជីវីត នៅក្នុងមន្ទីរពេទ្យ ។
ហេតុការណ៍នេះ បានកើតឡើងកាលពីវេលាម៉ោង ១រំលងអធ្រាត្រចូលថ្ងៃទី៨ ខែមករា ឆ្នាំ២០១៨ នៅភូមិទួលពង្រ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញហើយបង្កអោយមានការភ្ញាក់ផ្អើលដលសមត្ថកិច្ចកាលពីវេលាម៉ោង៦ព្រឹក ។
ជនរងគ្រោះដែលបានស្លាប់ឈ្មោះប៉ុនធឿន ធារ៉ា ភេទប្រុសអាយុ១៧ឆ្នាំ ស្នាក់នៅភូមិទួលពង្រ សង្កាត់ចោមចៅ២ ខណ្ឌពោធិ៍សែនជ័យបានរងរបួសពេញខ្លួន និងបានស្លាប់នៅមន្ទីរពេទ្យឯកជនក្បែរនោះ។
តាមប្រភពព័ត៌មានពីបងប្អូនជនរងគ្រោះបានអោយដឹងថា នៅវេលាម៉ោងប្រមាណ១យប់ស្រាប់តែឃើញជនរងគ្រោះរត់ និងស្រែកអោយអ្នកភូមិ ជួយ បន្ទាប់ពីមានក្មេងស្ទាវមួយក្រុម ប្រដាប់ដោយកាំបិត និងដែកឆាបដេញចាក់បណ្តាលអោយរងរបួស។បន្ទាប់ពីមានការភ្ញាក់ផ្អើលជនដៃដល់បានាំគ្នាគេចបាត់ ហើយជនរងគ្រោះត្រូវបានក្រុមគ្រួសារនាំទៅកាន់មន្ទីរពេទ្យ ឯកជននៅក្បែរនោះ ហើយដាច់ខ្យលស្លាប់។ទោះបីជាយ៉ាងណាគេពុំដឹងថាជនរងគ្រោះមានរឿងអ្វីនោះទេ បានជា គេដេញចាក់បែបនេះ ។
តាមព័ត៌មានអោយដឹងថា នៅវេលាម៉ោងប្រមាណ៦ព្រឹកថ្ងៃទី០៨ ខែមករា ទើបគ្រួសារបានរាយការណ៍មកសមត្ថកិច្ចចុះត្រួតពិនិត្យព្រមទាំងស្រាវជ្រាវរកមុខ ឃាតករ
សពត្រូវបាននគរបាលប្រគល់អោយ ក្រុមគ្រួសារធ្វើបុណ្យតាមប្រពៃណី ៕
