គណៈកម្មការ​មូល​ប​ត្រ​កម្ពុជា​ចុះ​អនុស្សរណៈ​យោគយល់​គ្នា​ជាមួយ​វិទ្យាស្ថាន ស៊ី​អ៊ី​អូ
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 27 March, 2018 ក+ ក-

 

ភ្នំពេញ ៖ ខណៈដែល​ពេលបច្ចុប្បន្ន ទើប​មាន​សហគ្រាស​ចំនួន​៥​ប៉ុណ្ណោះ ដែល​បាន​ចុះបញ្ជី​បោះផ្សាយ​មូល​ប​ត្រលក់​ជា​សាធារណៈ គណៈកម្មការ​មូល​ប​ត្រ​កម្ពុជា និង​វិទ្យាស្ថាន​ស៊ី​អ៊ី​អូ ក៏បាន​សម្រេច​ចុះហត្ថលេខា​លើ​អនុស្សារណៈ​យោគយល់​គ្នា ដើម្បី​ជម្រុញ​ដល់​ម្ចាស់​សហគ្រាស​ក្នុងស្រុក អោយបាន​យល់ច្បាស់​ពី​អត្ថ​ប្រ​យោ​ជ​ន៌​នៃ​ការបោះ​ផ្សាយ​លក់​មូល​ប​ត្រ និង​ត្រៀម​រៀបចំខ្លួន​ដើម្បី​ចូលក្នុង​ទីផ្សារ​វិស័យ​មូល​ប​ត្រ​នេះ​។

​នៅក្នុង​ពិធី​ចុះហត្ថលេខា​លើ​អនុស្សរណៈ​យោគយល់​គ្នា រវាង​គណៈកម្មការ​មូល​ប​ត្រ​កម្ពុជា និង​វិទ្យាស្ថាន​ស៊ី​អ៊ី​អូ ស្តីពី “​កិច្ចសហប្រតិបត្តិការ​លើកកម្ពស់​ការយល់ដឹង និង​ការអភិវឌ្ឍ​ធនធានមនុស្ស​នៅក្នុង​វិស័យ​មូល​ប​ត្រ នៅ​កម្ពុជា កាលពី​ល្ងាច​ថ្ងៃទី​២៦ ខែមីនា ឆ្នា​ម​២០១៨ លោកជំទាវ ងួន សុខា រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ បាន​ថ្លែង​បញ្ជាក់ថា ស្ថិតនៅក្នុង​ផែនការ​យុទ្ធសាស្ត្រ​អភិវឌ្ឍ​វិស័យ​ហិរញ្ញវត្ថុ​ឆ្នាំ​២០១៦ – ២០២៥ រាជរដ្ឋាភិបាល​កម្ពុជា បាន​អនុញ្ញាតឱ្យ​ក្រុមហ៊ុន សហគ្រាស​ធុន​តូច និង​មធ្យម អាច​បោះផ្សាយ​លក់​មូល​ប​ត្រ​ជា​សាធារណៈ​បាន ដោយ​ក្នុងនោះ រាជរដ្ឋាភិបាល​ក៏បាន​កំណត់​ជា​គោលនយោបាយ លើកទឹកចិត្ត​ផ្នែក​ពន្ធដារ សម្រាប់​ក្រុមហ៊ុន​ដែល​បាន​ចុះបញ្ជី​បោះផ្សាយ​លក់​មូល​ប​ត្រ​ជា​សាធារណៈ​ផងដែរ​។

ដូចគ្នានេះ លោក ស៊ូ សុជាតិ អគ្គនាយក​នៃ​គណៈកម្មការ​មូល​ប​ត្រ​កម្ពុជា យល់ឃើញថា ទីផ្សារ​មូល​ប​ត្រ​គឺ​ប្រភព​ដ៏​សំខាន់​មួយ​ដែល​អាចជួយ​ដល់​សហគ្រិន​ក្នុងស្រុក​អាច​ប្រមូល​ដើមទុន​បន្ថែម​សម្រាប់​ពង្រីក​អាជីវកម្ម​របស់ខ្លួន និង​ថែមទាំង​ធ្វើអោយ​មជ្ឈដ្ឋាន​ក្នុងស្រុក​និង​បរទេស ទទួលស្គាល់​ក្រុមហ៊ុន​សហគ្រាស កាន់តែច្រើន​ទៀតផង​។ ប៉ុន្តែ​ដើម្បី​អាចឈាន​ទៅដល់​ការចុះបញ្ជី​ក្នុង​ទីផ្សារ​មូល​ប​ត្រ​បាន ឯកឧត្តម ស៊ូ សុជាតិ បាន​ពន្យល់ថា លុះត្រា​ក្រុមហ៊ុន រឺ​សហគ្រាស​នោះ មានការ​រៀបចំ​ស្តង់ដារ​អោយបាន​ច្បាស់លាស់ ទាំង​ការ​ការងារ​អភិបាលកិច្ច និង​ការគ្រប់គ្រង​បញ្ជី​ហិរញ្ញវត្ថុ​។​

​បើតាម​ការលើកឡើងរ​បស់ លោក អោម សេង បូរ៉ា ដែលជា​ស្ថាបនិក​និង​ប្រធាន​ក្រុមប្រឹក្សាភិបាល CEO Master Club និង​វិទ្យាស្ថាន​ស៊ី​អ៊ី​អូ យល់ឃើញថា ខណៈដែល​មាន​ក្រុមហ៊ុន​បរទេស​ជាច្រើន​កំពុង​ហូរ​ចូលមកក្នុង​ទីផ្សារ​កម្ពុជា​នោះ ក្នុង​រយៈពេល​៥​ឆ្នាំ​ខាងមុខ​ទៀត នឹងមាន​ការប្រកួតប្រជែង​កាន់​ខ្លាំង ក្នុង​ដំណើរការ​អាជីវកម្ម ដូចនេះ​ក្រុមហ៊ុន​ក្នុងស្រុក គួរ​ត្រៀមខ្លួន​អោយមាន​ស្តង់ដារ​ជាមុន​។

​ទន្ទឹម​នោះ លោក រំពឹងថា សមាជិក​ទាំង​៥៧០​នាក់ របស់ CEO Master Club ដែលជា​ម្ចាស់​អាជីវកម្ម​នានា​ជាង​១០០០​ក្រុមហ៊ុន ក៏ នឹង រៀបចំ​អាជីវកម្ម​របស់ខ្លួន​ឱ្យមាន​ស្ដង់ដារ ដើម្បី​អាច​ប្រមូល​ដើមទុន​បន្ថែម​សម្រាប់​ពង្រីក​អាជីវកម្ម តាមរយៈ​ការបោះ​ផ្សាយ​លក់​មូល​ប​ត្រ​ជា​សាធារណៈ​៕​