ភ្នំពេញ ៖ សម្តេចតេជោ នាយករដ្ឋមន្ត្រី បានជំរុញដល់ក្រសួងសុខាភិបាល និងក្រសួងពាក់ព័ន្ធ សិក្សានិងរៀបចំបែងចែកបញ្ជូនគ្រូពេទ្យអោយបានច្រើនបន្ថែមទៀតទៅបំរើការងារក្នុងភូមិឃុំ ដើម្បីផ្តល់សេវាសុខាភិបាលអោយកាន់តែប្រសើរជូនប្រជាពលរដ្ឋក្នុងមូលដ្ឋាន។
ថ្លែងនៅក្នុងពិធីបិទសន្និបាតសុខាភិបាលលើកទី៣៩ នារសៀលថ្ងៃទី២៧ ខែមីនា នេះ នៅសណ្ឋាគារសូហ្វីតែល ភ្នំពេញ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា ចំនួនគ្រូពេទ្យក្នុងក្របខណ្ឌរដ្ឋ នាពេលបច្ចុប្បន្ន មានការកើនឡើងដល់ជាង២ម៉ឺន៥ពាន់នាក់ ដោយក្នុងចំណោមនោះ មានគ្រូពេទ្យជាង១ម៉ឺន៨ពាន់នាក់ រឺស្មើនឹងប្រមាណ៧៣ភាគរយនៃចំនួនសរុប កំពុងបំរើការងារក្នុងវិស័យសុខាភិបាល នៅតាមថ្នាក់ខេត្ត។នៅក្នុងចំនុចនេះ អ្វីដែលសម្តេចតេជោ នាយករដ្ឋមន្ត្រី មានការព្រួយបារម្ភ គឺថាតើមានចំនួនគ្រូពេទ្យគ្រប់គ្រាន់ដែររឺទេ សម្រាប់ការផ្តល់សេវាសុខាភិបាល ជូនប្រជាពលរដ្ឋ នៅមន្ទីរពេទ្យបង្អែក និងមណ្ឌលសុខភាពនានាក្នុងមូលដ្ឋាន ភូមិ ឃុំ ជាពិសេសក្នុងតំបន់ដាច់ស្រយាល។ ដោយមើលឃើញដូចនេះ សម្តេចតេជោ បានស្នើដល់ក្រសួងសុខាភិបាល ត្រូវសិក្សា និងរៀបចំការបែងចែក ចំនួនគ្រូពេទ្យអោយមានប្រសិទ្ធភាព ទៅដល់មូលដ្ឋានជិតប្រជាពលរដ្ឋ ជាជាងការប្រមូលផ្តុំចំនួនគ្រូពេទ្យច្រើននៅក្នុងតែថ្នាក់ខេត្ត រឺទីប្រជុំជននោះ។
មុនគ្រូពេទ្យមានមិនដល់២ម៉ឺននាក់ទេ តែពេលនេះមានជាង២ម៉ឺន៥ពាន់៤រយនាក់ យើងត្រូវតែមានការការគិតគូរពីការបំពាក់សម្ភារៈបច្ចេកទេសនៅតាមមន្ទីរពេទ្យផងដែរ ដើម្បីអោយការបែងចែកចំនួនគ្រូពេទ្យអោយមានប្រសិទ្ធភាព ក្នុងការទៅបំរើការងារផ្នែកសុខាភិបាលនៅក្នុងមូលដ្ឋាននេះដែរ។
សម្តេចតេជោ ក៏បានចាត់អោយក្រសួង មុខងាសាធារណៈ និងក្រសួងសេដ្ឋកិច្ចនិងហិរញ្ញវត្ថុ សិក្សាពីថវិកាលើកទឹកចិត្ត និងកន្លែងស្នាក់នៅ សម្រាប់ គ្រូពេទ្យដែលស្ម័គ្រចិត្តទៅបំពេញការងារនៅក្នុងមូលដ្ឋានឆ្ងាយផងដែរ។ ជាងនេះទៀត សម្តេចតេជោ ក៏បានជម្រុញអោយមានការគិតគូពីលើការបំពាក់សម្ភារៈវេជ្ជសាស្ត្រ និងបច្ចេកទេសទំនើបអោយបានគ្រប់គ្រាន់នៅក្នុងមន្ទីរពេទ្យ និងកន្លែងផ្តល់សេវាសុខាភិបាល ដោយត្រូវរៀបចំគ្រូពេទ្យ អោយត្រូវនឹងជំនាញឯកទេសរបស់គ្រូពេទ្យនីមួយៗផងដែរ។
បើតាមរបាយការណ៌របស់ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានបង្ហាញថា ក្នុងឆ្នាំ២០១៧កន្លងទៅ ប្រជាពលរដ្ឋដែលមកពិនិត្យជំងឺក្រៅនៅ កន្លែងផ្តល់សេវាសុខភាពទូទាំងប្រទសមានចំនួនសរុបជិត ១៣លាន២សែននាក់ ។
ទន្ទឺមនេះ តាមរយៈកម្មវិធីមូលនិធិសមធម៌ ដែលផ្តល់សេវាវេជ្ជសាស្ត្រសម្រាប់ប្រជាពលរដ្ឋក្រីក្រ ជនពិការ ចាស់ជរាគ្មានទីពឹង បានកើនឡើងពីចំនួនជាង ២លាន៤សែនករណី នៅឆ្នាំ២០១៦ ដល់ ចំនួនជាង២លាន៦សែនករណី នៅឆ្នាំ២០១៧។ ចំណែក មណ្ឌលសុខភាពសរុបទូទាំងប្រទេស មានចំនួន១១៩០៕៕
