ភ្នំពេញ ៖ រយៈជាងពេលជាងពីរទសវត្សមកនេះ ប្រទេសជប៉ុនបានដើរតួនាទីយ៉ាងសំខាន់ក្នុងកិច្ចការស្វែងរកសន្តិភាព និងជួយពង្រឹងការងារក្នុងវិស័យជាច្រើននៅកម្ពុជា! មកដល់ពេលនេះ រាជរដ្ឋាភិបាលកម្ពុជា នៅតែចាត់ទុកប្រទេសជប៉ុន ជាដៃគូអភិវឌ្ឍន៌ធំបំផុត ដែលអាចជួយជម្រុញ អោយកម្ពុជាសម្រេចគោលដៅ ជាប្រទេសមានប្រាក់ចំនូលកំរិតខ្ពស់នាឆ្នាំ២០៣០។
កាលពីថ្ងៃទី៨ ខែមេសា រាជរដ្ឋាភិបាលកម្ពុជា និងរដ្ឋាភិបាលជប៉ុន បានចុះហត្ថលេខាលើលិខិតប្តូរសារចំនួនពីរ ស្តីពីការ ផ្តល់ហិរញ្ញប្បទានរបស់រដ្ឋាភិបាលជប៉ុន មកកាន់រាជរដ្ឋាភិបាលកម្ពុជា ក្នុងទឹកប្រាក់សរុប ជាង៩០លានដុល្លារអាមេរិក ស្របពេលដែលឆ្នាំ២០១៨នេះ គឺជាខួបអនុស្សាវរីយ៌ រយៈពេល៦៥ឆ្នាំ នៃទំនាក់ទំនងការទូតរវាងទាំងពីរ។ ការចុះហត្ថលេខាលើលិខិតប្តូរសារចំនួនពីររវាងរដ្ឋាភិបាលនៃប្រទេសទាំងពីរ ដែលតំណាងដោយ លោក ប្រាក់សុខុនរដ្ឋមន្ត្រីក្រសួងការបរទេសនិងសហប្រតិបត្តិការកម្ពុជា ជាមួយ លោក តារ៉ូ កូណូ រដ្ឋមន្ត្រីការបរទេសជប៉ុន ដែលមានវត្តមាន សម្តេចតេជោ នាយករដ្ឋមន្ត្រីកម្ពុជា ជាសក្ខីភាពនេះ រួមមាន ៖ ទី១៖ ហិរញ្ញប្បទានឥតសំណងជប៉ុន ដែលមានទឹកប្រាក់សរុបចំនួន ៥០០ លានយ៉េន ស្មើនឹងប្រមាណ៥លានដុល្លារអាមេរិក សម្រាប់អនុវត្តគម្រោងកម្មវិធីអភិវឌ្ឍន៍សេដ្ឋកិច្ច និងសង្គម នៅកម្ពុជា ទី២៖ ឥណទានសម្បទានជប៉ុន ដែលមានទឹកប្រាក់សរុបចំនួន ៩ពាន់២១៦ លានយ៉េន ស្មើនឹងប្រមាណ ៨៦ លានដុល្លារអាមេរិក សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនី នៅរាជធានីភ្នំពេញ ជំហានទី២។
តាមរយៈការចុះហត្ថលេខានេះ ប្រមុខរាជរដ្ឋាភិបាលកម្ពុជា បានបង្ហាញថា ប្រទេសជប៉ុនគឺជាមិត្ត និងជាដៃគូអភិវឌ្ឍន៌ ដែលដើរតួនាទីសំខាន់ ទាំងការស្វែងរកសន្តិភាពរបស់កម្ពុជា និងបានជួយគាំទ្រកម្ពុជា ក្នុងការស្តារនិងអភិវឌ្ឍ លើវិស័យជាច្រើន ដូចជាលើវិស័យហេដ្ឋារចនាសម្ព័ន្ធ កំពង់ផែ តំបន់សេដ្ឋកិច្ចពិសេស វិស័យទឹកស្អាត ប្រព័ន្ធការពារទឹកជំនន់ ការបណ្តុះបណ្តាលធនធានមនុស្ស ជាដើម ។ ជាងនេះទៀត រដ្ឋាភិបាលជប៉ុន នៅតែបង្ហាញជំហរបន្តគាំទ្រ ដល់កម្ពុជា អោយសម្រេចតាមគោលដៅជាប្រទេសមានប្រាក់ចំណូល មធ្យមកំរិតខ្ពស់នាឆ្នាំ២០៣០ផងដែរ។
គួរបញ្ជាក់ថា ប្រទេសកម្ពុជា និង ប្រទេសជប៉ុន បានជម្រុញទំនាក់ទំនង ក្លាយជាដៃគូយុទ្ធសាស្ត្រ ចាប់តាំងពីឆ្នាំ២០១៣មក ក្នុងនោះប្រទេសជប៉ុន គឺជាដៃគូអភិវឌ្ឍន៌ ដែលបានផ្តល់ជំនួយច្រើនជាងគេមកកម្ពុជា ក្នុងរយៈពេលជាង២ទសវត្សមកនេះ។
បើគិតចាប់ពីឆ្នាំ១៩៩២ រហូតមកត្រឹមដំណាច់ឆ្នាំ២០១៧ ប្រទេសជប៉ុនបានផ្តល់ថវិកាហិរញ្ញប្បទានសហប្រតិបត្តិការសម្រាប់គម្រោងអភិវឌ្ឍន៍នានានៅកម្ពុជា សរុបប្រមាណ ៤ពាន់៤រយលានដុល្លារអាមេរិក ក្នុងនោះហិរញ្ញប្បទានឥតសំណងមានចំនួនជាង៣ពាន់លានដុល្លារ និងឥណទានសម្បទានមានចំនួន ជាង១ពាន់៣រយលានដុល្លារ។
តាមរយៈ ការចុះកិច្ចព្រមព្រៀងដើម្បីការពារអ្នកវិនិយោគ រវាងប្រទេសកម្ពុជា ជាមួយប្រទេសជាង៣០ កាលពីថ្ងៃទី៣០ ខែមីនាកន្លងមកនេះ ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានបង្ហាញថា គឺមានតែកិច្ចព្រមព្រៀង ជាមួយប្រទេសជប៉ុនប៉ុណ្ណោះ ដែលមានការចុះហត្ថលេខាផ្ទាល់ដោយប្រមុខរដ្ឋាភិបាល នៃប្រទេសទាំងពីរ។ ព្រោះរាជរដ្ឋាភិបាលកម្ពុជា ចង់អោយអ្នកវិនិយោគជប៉ុន ចូលមកកម្ពុជាកាន់តែច្រើន ដោយសារ ការវិនិយោគជប៉ុនមានសារសំខាន់ ក្នុងការអភិវឌ្ឍន៍សេដ្ឋកិច្ច និងសង្គម។ ជាងនេះទៀត ប្រទេសកម្ពុជាចាត់ទុកថា អ្នកវិនិយោគជប៉ុនមិនត្រឹមតែយកប្រាក់មកវិនិយោគនោះទេ តែពួកគេយកទាំងបេះដូងមកជាមួយផងដែរ ដោយក្រុមហ៊ុនជប៉ុន តែងចាត់ទុកអ្នកធ្វើការឲ្យខ្លួនជាប្រតិបត្តិករដ៏សំខាន់ និងបានផ្តល់ជំនាញល្អៗបន្ថែមដល់បុគ្គលិកជាជនជាតិកម្ពុជាទៀតផង។
យោងតាមទិន្នន័យរបស់ក្រុមប្រឹក្សាអភិវឌ្ឍន៍កម្ពុជា (CDC) បង្ហាញថា គិតត្រឹមឆ្នាំ២០១៧ មានគម្រោងចំនួន១៣០របស់ជប៉ុន ក្នុងទុនវិនិយោគសរុបប្រមាណ ១ពាន់៦រយលានដុល្លារអាមេរិក ដែលត្រូវបានរដ្ឋាភិបាលកម្ពុជាអនុម័តចុះបញ្ជី ជាគម្រោងវិនិយោគមានលក្ខណៈសម្បត្តិគ្រប់គ្រាន់ ៕
(លោកយូគី អូសៃតា អគ្គនាយក នៃអគ្គនាយកដ្ឋានកិច្ចការអាស៊ីខាងត្បូងនៃក្រសួងការងារ
ប្រទេសជប៉ុនកាលពីរសៀលថ្ងៃទី៩ ខែមេសា)
