ថៃត្រៀមកម្លាំងជិត២ម៉ឺននាក់​ការពារសុវត្ថិភាពនៃកិច្ចប្រជុំកំពូលអាស៊ានលើកទី៣៥ខាងមុខនេះ
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 31 October, 2019 ក+ ក-

បាងកក ៖ កម្លាំង​សន្តិសុខ​ថៃបាន​ចាប់ផ្តើម​ធ្វើសមយុទ្ធ​កាលពីថ្ងៃទី២៩ ខែតុលា ឆ្នាំ​២០១៩ នៅ Muang Thong Thani ក្នុងក្រុងបាងកក ជាទីកន្លែងដែល​មេដឹកនាំ​ពិភពលោក ក្នុងនោះរួមមានទាំងសម្តេច ហ៊ុន សែន នាយករដ្ឋមន្រ្តីកម្ពុជា​ផង នឹង​អញ្ជើញទៅ​ចូលរួម​កិច្ចប្រជុំកំពូលអាស៊ានលើកទី៣៥ និង​កិច្ចប្រជុំពាក់ព័ន្ធ នាដើមខែវិច្ឆិកាខាងមុខនេះ។

លោកឧបនាយករដ្ឋមន្រ្តីថៃ Prawit Wongsuwon ​ដែលបាន​ធ្វើជាអធិបតី​ក្នុង​ពីធីបើក​ការធ្វើ​សមយុទ្ធ​នេះ ក្នុងនាម​ជាមេ​សន្តិសុខ​ជាតិបាន​និយាយ​ថា លោក​មានទំនុកចិត្ត​ចំពោះ​ប្រទេសថៃ ដែល​ត្រៀម​ខ្លួនរួចរាល់​ក្នុងការ​ឆ្លើយតបទៅនឹង​ហេតុការណ៍កើតឡើង​ណាមួយ​ ក្នុង​អំឡុង​កិច្ចប្រជុំ​កំពូលនេះ។

ការហ្វឹកហាត់នេះ ធ្វើជារបៀប​ឆ្លើយតប​នឹង​ការគំរាម​កំហែង​សន្តិសុខ​កម្រិត​ខ្ពស់ ព្រមទាំង​ប្រតិបត្តិការ​សង្គ្រោះ និង​ជម្លៀស​មេដឹកនាំ​ និង​ភ្ញៀវ​ដែលចូលរួម​ក្នុងកិច្ចប្រជុំ។ ក្រៅពីនេះក៏គេឃើញ​មាន​ឧទ្ធម្ភាគចក្រ Black Hawk មួយគ្រឿងផងដែរ ចូលរួមក្នុងសមយុទ្ធនេះ ពោលគឺ​កម្លាំងសន្តិសុខ ហ្វឹកហាត់​ចេញពី​ឧទ្ធម្ភាគចក្រ​ចុះតាម​ខ្សែពួមកក្រោម។

កម្លាំងប៉ូលិស និង​សន្តិសុខថៃ ប្រមាណ១៧០០០នាក់ ដោយ​រួមមាន​ទាំង​កងកូម៉ង់ដូ​ផងនោះ នឹងត្រូវ​ចល័ត​ដើម្បី​ការពារ​សន្តិសុខ​ក្នុង​កិច្ចប្រជុំ​កំពូល​ដែលចាប់ផ្តើម​ធ្វើឡើង​នៅចុង​សប្តាហ៍​នេះ។

កិច្ចប្រជុំ​សំខាន់ៗ​រួមមាន៖ កិច្ច​ប្រជុំ​កំពូលអាស៊ាន លើកទី៣៥, កិច្ច​ប្រជុំ​កំពូលអាស៊ាន-ចិន លើកទី២២, កិច្ច​ប្រជុំ​កំពូលអាស៊ាន-ឥណ្ឌា លើកទី១៦, កិច្ច​ប្រជុំ​កំពូលអាស៊ាន-អង្គការ​សហប្រជាជាតិលើកទី១០, កិច្ច​ប្រជុំ​កំពូលអាស៊ានបូកបី លើកទី២២, កិច្ច​ប្រជុំ​កំពូលអាស៊ាន-សហរដ្ឋអាមេរិក លើកទី៧, កិច្ច​ប្រជុំ​កំពូលអាស៊ីបូព៌ា លើកទី១៤, កិច្ច​ប្រជុំ​កំពូលអាស៊ាន-ជប៉ុន លើកទី២២ និងកិច្ច​ប្រជុំ​កំពូល​ភាព​ជាដៃគូ​សេដ្ឋកិច្ច​ទូលំទូលាយ​ក្នុង​តំបន់​លើកទី៣៕