ចិន ៖ រដ្ឋមន្ត្រីការពារជាតិចិនលោក Wei Fenghe កាលពីថ្ងៃច័ន្ទបានអំពាវនាវ ដល់យោធាអាមេរិកឲ្យបញ្ឈប់សកម្មភាព បង្អួតសាច់ដុំរបស់ខ្លួននៅក្នុងសមុទ្រចិនខាងត្បូង និងចៀសវាងការបន្ថែមនូវភាពមិនប្រាកដប្រជាថ្មីលើកោះតៃវ៉ាន់ ក្នុងអំឡុងកិច្ចពិភាក្សាកម្រិតខ្ពស់ដែលសង្កត់ធ្ងន់លើភាពតានតឹង រវាងប្រទេសមហាអំណាចសេដ្ឋកិច្ចធំបំផុតទាំង២ របស់ពិភពលោក។
ការលើកឡើងរបស់ លោក Wei Fenghe ធ្វើឡើងក្នុងរយៈពេល ២សប្ដាហ៍ បន្ទាប់ពីមន្ត្រីជាន់ខ្ពស់នៃសេតវិមានបានប្រកាស អំពីការបំភិតបំភ័យរបស់ចិននៅក្នុងផ្លូវទឹកដ៏មមាញឹក មួយនេះ និងបន្ទាប់១ថ្ងៃបន្ទាប់ពីរដ្ឋមន្ត្រីក្រសួងការពារជាតិសហរដ្ឋអាមេរិកលោក Mark Esper បានចោទប្រកាន់ជាសាធារណៈ លើទីក្រុងប៉េកាំងពីបទបង្កើនការបង្ខិតបង្ខំ និងការបំភិតបំភ័យ ដើម្បីពន្លឿនគោលដៅយុទ្ធសាស្ត្ររបស់ខ្លួននៅក្នុងតំបន់។
លោក Wu Qian អ្នកនាំពាក្យយោធាចិនបាននិយាយថា ក្នុងអំឡុងកិច្ចពិភាក្សាបិទទ្វារនៅខាងក្រៅ កិច្ចប្រជុំថ្នាក់រដ្ឋមន្ត្រីក្រសួងការពារជាតិ ក្នុងទីក្រុងបាងកកប្រទេសថៃ លោក Wu Qian បានជំរុញឱ្យលោក Esper បញ្ឈប់ការបង្ហាញសាច់ដុំនៅសមុទ្រចិនខាងត្បូង និងកុំបង្កភាពតានតឹងឲ្យកាន់តែរីកធំថែមទៀតនៅសមុទ្រចិនខាងត្បូង។
សូមជម្រាបថា សហរដ្ឋអាមេរិកចោទប្រកាន់ចិនថា បានធ្វើយោធូបនីយកម្មនៅសមុទ្រចិនខាងត្បូង និងព្យាយាមបំភិតបំភ័យប្រទេសជិតខាងនៅអាស៊ី ដែលប្រហែលជាចង់កេងចំណេញធនធានប្រេង និងឧស្ម័នយ៉ាងច្រើនរបស់ខ្លួន៕
