សម្ដេចតេជោ ៖ អភិបាលក្រុងភ្នំពេញ ខេត្តកណ្ដាល និងខេត្តកំពង់ស្ពឺ ត្រូវបញ្ជៀសប្រទូស្តរ៉ាយដោយសារស្ទះចរាចរណ៍
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានបញ្ជាឱ្យអភិបាលរាជធានីភ្នំពេញ អភិបាលខេត្តកណ្តាល និងអភិបាលខេត្តកំពង់ស្ពឺ ត្រូវខិតខំជួយសម្រួលដល់ការធ្វើដំណើររបស់មន្រ្តីរាជការ បុគ្គលិកឯកជន កម្មករ កម្មការិនី អាជីវករ រួមទាំងអ្នកសារព័ត៌មានផងដែរ ដែលតែងតែចេញចូលធ្វើការនៅរាជធានីភ្នំពេញ។
តាមរយៈសារជាសំឡេង សម្តេចតេជោ បានណែនាំឱ្យតាមដានឱ្យបានយកចិត្តទុកដាក់ខ្ពស់ចំពោះការចេញចូលរវាងភូមិសាស្រ្តខេត្តកណ្តាល ជាមួយនឹងរាជធានីភ្នំពេញ ក្រៅពីនោះ ខេត្ត កណ្តាល និងខេត្តកំពង់ស្ពឺ ក៏ត្រូវមានការសម្រួលដោះ ស្រាយនៃការធ្វើដំណើរនេះឱ្យបានល្អបំផុតផងដែរ ដើម្បីជៀសវាងការកកស្ទះ ឬមានការប្រទូស្តរ៉ាយណាមួយកើតឡើង៕
