បរទេស ៖ អ្នកសារព័ត៌មានចិនបានផ្សព្វផ្សាយនូវការប្រៀបធៀបតាមរបៀបឌឺដងទៅអាមេរិក ទាក់ទងចលនាបាតុកម្មប្រឆាំងនឹងការរើសអើងពូជសាសន៍នៅសហរដ្ឋអាមេរិក ធៀបទៅនឹង ចលនាទាមទារលិទ្ធិប្រជាធិបតេយ្យនៅហុងកុង។ នេះបើយោងតាមការចុះផ្សាយកាលពីម្សិលមិញរបស់សារព័ត៌មានចិន។
សារព័ត៌មានចិនបានផ្សាយថា តាមរយៈព្រឹត្តិការណ៍បាតុកម្មប្រឆាំងនឹងការរើសអើងពណ៌សម្បុរ នៅសហរដ្ឋអាមេរិក ដែលបណ្តាលឱ្យមានការដុតបំផ្លាញឡានប៉ូលិស, ដុតហាងទំនិញ, វាយតប់ប្រឈមមុខដាក់គ្នារវាងប៉ូលិសនិងហ្វូងបាតុករ, ការចាប់ឃុំខ្លួនក្រុមបាតុកម្មច្រើនរយនាក់ ហើយក៏មានស្លាប់មនុស្សផងនោះបានបង្ហាញថា សិទ្ធិមនុស្សនៅអាមេរិក ជាការបន្លំបំភាន់ភ្នែកតែប៉ុណ្ណោះ។
យោងតាមកាសែតចិន Global Times ស្និទ្ធនឹងបក្សកុម្មុយនិស្តចិន បានប្រៀបធៀបពី ចលនាបាតុកម្មប្រឆាំងនឹងស្អប់ខ្ពើមពូជសាសន៍នៅសហរដ្ឋអាមេរិក ធៀបទៅនឹង ចលនាទាមទារលិទ្ធិប្រជាធិបតេយ្យនៅហុងកុង ដែលមានចំណុចរួមដែរ គឺហិង្សាដុតបំផ្លាញចេញភ្លើង។ កាសែតចិនជាភាសាអង់គ្លេសនេះ បានរម្លឹកដាក់ផ្លែផ្កាថា «មានម្តងនោះ ប្រធានរដ្ឋសភាអាមេរិក លោកស្រី Nancy Pelosi បានចាត់ទុកថា បាតុកម្មហិង្សានៅហុងកុង គឺស្រស់ស្អាត ជាឆាកដ៏គួរឱ្យចង់គយគន់។ ម្តងនេះ ទិដ្ឋភាពស្រស់ស្អាតដ៏គួរឱ្យចង់គយគន់នេះ បានទៅដល់រដ្ឋមួយចំនួនរបស់អាមេរិកវិញហើយ។ អ្នកនយោបាយអាមេរិកអាចមើល ទិដ្ឋភាពស្រស់ស្អាតនេះ ពីបង្អួចតែម្តង៕
