ភ្នំពេញ៖ប្រធានក្រុមស្រាវជ្រាវបញ្ហាព្រំ ដែននៅរាជបណ្ឌិត្យសភាកម្ពុជានៅថ្ងៃចន្ទនេះ បានស្នើទៅតំណាងរាស្ត្រដែលមានអាសនៈនៅក្នុងរដ្ឋសភា ពិចារណាការធ្វើវិសោធនកម្មរដ្ឋធម្មនុញ្ញមាត្រា២ ក្រោយពីការបោះបង្គោលព្រំដែនជាមួយវៀតណាមចប់សព្វគ្រប់ បើមិនដូច្នេះទេនឹងមានជម្លោះនយោបាយសម្រាប់ថ្នាក់ដឹកនាំខ្មែរជំនាន់ក្រោយៗទៀត។
វីអូឌីបានសរសេរនៅថ្ងៃនេះថា លោក សុខ ទូច ប្រធានក្រុមស្រាវជ្រាវបញ្ហាព្រំដែននៅរាជបណ្ឌិត្យសភាកម្ពុជា មាត្រា២នៃរដ្ឋធម្មនុញ្ញកម្ពុជាចែងថាបូរណភាពទឹកដី របស់ព្រះរាជាណាចក្រកម្ពុជាមិនអាចរំលោភបានដាច់ខាតក្នុងព្រំដែន របស់ខ្លួនដែលមានកំណត់ក្នុងផែនទីខ្នាត១/១០០.០០០ធ្វើនៅចន្លោះ ឆ្នាំ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣-១៩៦៩។
ក្នុងពេលទទួលផែនទីពីគណបក្សសង្គ្រោះជាតិ នៅទីស្នាក់ការរបស់គណបក្ស លោក សុខ ទូច បានថ្លែងថាលោកគ្រាន់តែស្នើឲ្យមានវិសោធនកម្មរដ្ឋធម្ម នុញ្ញត្រង់មាត្រា២ ដើម្បីធានាកុំឲ្យមានជម្លោះនយោបាយសម្រាប់ថ្នាក់ ដឹកនាំជំនាន់ក្រោយៗទៀត។ លោកបន្តថាបើតាមរដ្ឋធម្មនុញ្ញដែលចែងថាផែនទីយកតាមចន្លោះឆ្នាំ ១៩៣៣-១៩៥៣ កម្ពុជានឹងបាត់ដីនៅតំបន់ដាក់ហូតក្នុងខេត្តរតនគិរី ដោយសារតំបន់នោះធ្វើឡើងនៅឆ្នាំ១៩១៤។ លោកបន្ថែមថាតំបន់ដាក់ហូតមានបង្គោលសរសេរជា៣ភាសា គឺភាសាខ្មែរ វៀតណាមនិងបារាំង។ លោកបញ្ជាក់បន្ថែមថាបើតាមផែនទីដែលចែងក្នុងរដ្ឋធម្មនុញ្ញ តំបន់ដាក់ដាំដែលជាតំបន់មួយទៀតក្នុងខេត្តមណ្ឌលគិរី មានតែបន្ទាត់ តែមិនមានបង្គោលនោះទេ។
លោក សុខ ទូច ថ្លែងថាប្រសិនបើមិនធ្វើវិសោធនកម្មរដ្ឋធម្មនុញ្ញនោះទេ កម្ពុជានឹងបាត់បង់ទឹកដី ហើយលោកព្រមានកុំទៅបន្ទោសអ្នកវិទ្យាសាស្ត្រដែលបានសិក្សារួចហើយ។
លោកបានបញ្ជាក់ថា៖ “ហើយក្រោយពីបោះបង្គោលហើយ បើអត់ធ្វើវិសោធនកម្មរដ្ឋធម្មនុញ្ញទេ អាបង្គោលបោះហ្នឹងក៏អត់មានន័យដែរ ព្រោះវាអត់មានចងច្បាប់។ អញ្ចឹងអ្នកដែលជេរខ្ញុំ សូមឲ្យពិនិត្យឡើងវិញ។
រាល់ការដែលមិនចងច្បាប់ មានន័យថាខំធ្វើ ខំជជែកគ្នា គឺអត់មានន័យទេ។ អ្នកឡើងកាន់អំណចមកក្រោយ ថាអត់មានក្នុងរដ្ឋធម្មនុញ្ញ ផងរលាយអស់។ កុំភ្លេចគេសប្បាយចិត្ត នៅពេលដែលយើងអត់ចងច្បាប់ គេរីករាយណាស់ នឹងរំលោភយើងបន្តទៀត”។ លោកបានបន្ថែមថា៖ “ខាងខ្ញុំមិន មែនមានន័យថាតម្រូវទេ គ្រាន់តែផ្តល់គំនិតថា ក្រោយពីបោះបង្គោលចំសព្វគ្រប់ ក្រោយពីបានទទួលផែនទីគ្រប់មជ្ឈដ្ឋានហើយអ្នកនយោបាយយកផែនទីណាក៏យក ទៅ។ បោះបង្គោលយ៉ាងម៉េចក៏បោះទៅ ប៉ុន្តែក្រោយពីបោះហ្នឹង ត្រូវតែធ្វើវិសោធនកម្មរដ្ឋធម្មនុញ្ញ បើមិនធ្វើទេមានន័យថាស្មើសូន្យ”។
បើតាមលោក សុខ ទូច រហូតមកដល់ពេលនេះ ក្រុមស្រាវជ្រាវបញ្ហាព្រំដែននៅរាជបណ្ឌិតសភាកម្ពុជា បានទទួលផែនទីពីអតីតរដ្ឋមន្ត្រីក្រសួងរ៉ែ និងថាមពលនៃរបបសាធារណរដ្ឋ លន់ នល់ និងជាប្រធានគណៈកម្មាធិការព្រំដែនកម្ពុជាដែលមានមូលដ្ឋាននៅប្រទេស បារាំង លោក ស៊ាន ប៉េងសែ ពីបណ្ណាល័យពីបារាំង ពីបណ្ណាល័យរបស់ព្រឹទ្ធសភាអាមេរិក ពីអង្គការសហប្រជាជាតិ ពីរដ្ឋាភិបាល ពីអ្នកសិក្សាស្រាវជ្រាវផ្សេងទៀតនិងចុងក្រោយពីគណបក្ស សង្គ្រោះជាតិ។
កន្លងទៅលោកនាយករដ្ឋមន្ត្រី ហ៊ុន សែន ធ្លាប់បានថ្លែងថារដ្ឋធម្មនុញ្ញកម្ពុជាបានសរសេរខ្វះចន្លោះ ដែលលោកអះអាងថាពិបាកយកទៅតតាំងជាមួយវៀតណាម ។ ចំណែកកាលពីថ្ងៃទី០៣ខែសីហា ឆ្នាំ២០១៥ លោក ហ៊ុន សែន បានថ្លែងថាលោកនឹងលុបចោលកិច្ចព្រមព្រៀងជាមួយវៀតណាម ប្រសិនបើមានការវិសោធនកម្មរដ្ឋធម្មនុញ្ញ ដោយចែងជំនួសថាកម្ពុជាប្រើប្រាស់ផែនទីខ្នាត១/៥០.០០០វិញ។ លោកបញ្ជាក់ថា៖ ”បើសិនជារដ្ឋធម្មនុញ្ញបានចែងថាផែនទីនៃ ព្រះរាជាណាចក្រកម្ពុជាប្រើប្រាស់ផែនទីខ្នាត១/៥០.០០០ ខ្ញុំព្រះករុណាក៏សុខចិត្តលុបចោលកិច្ចព្រមព្រៀងសន្ធិសញ្ញាជាមួយ វៀតណាមដែរ។ តែមាត្រាទី២នៃរដ្ឋធម្មនុញ្ញគេឲ្យប្រើថាផែនទីអធិបតេយ្យរបស់កម្ពុជា មានចែងនៅក្នុងផែនទីខ្នាត១/១០០.០០០ បោះពុម្ពក្នុងចន្លោះឆ្នាំ១៩៣៣-៥៣ ដែលអន្តរជាតិទទួលស្គាល់៦៣-៦៩”។
លោកនាយករដ្ឋមន្ត្រី ហ៊ុន សែន បន្តថាកាលពីឆ្នាំ១៩១៤ អគ្គទេសាភិបាលឥណ្ឌូចិនបានចេញសេចក្តីសម្រេចមួយថាព្រំដែនកម្ពុជា ត្រូវដើរតាមទន្លេដាក់ហូត តែលោកថាបារាំងបានគូសផែនទីទៅតាមដាក់ដាំ។ លោកបន្តថាប្រសិនបើកម្ពុជាប្តឹងទៅតុលាការអន្តរជាតិ កម្ពុជានឹងមិនទទួលជ័យជម្នះហើយនឹងបាត់បង់ទឹកដីជាង៥០គីឡូ ម៉ែត្រការ៉េ។ លោកបញ្ជាក់ថា៖ “…យើងប្តឹងទៅអង្គការសហប្រជាជាតិថា អាមេរិកបានទម្លាក់គ្រាប់បែកនៅម្តុំដាក់ដាំ ដល់ទៅផែនទីដើរតាមដាក់ហូត អញ្ចឹងបានសចក្តីថាសម័យនោះ ។រដ្ឋមន្ត្រីការបរទេសជំនាន់នោះ អ្នកស៊ីញ៉េលើផែនទីជំនាន់នោះ បានប្រគល់ទឹកដី៥១គីឡូម៉ែត្រការ៉េឲ្យទៅវៀតណាមរួចស្រេចទៅហើយ”។
កន្លងទៅ ប្រធានគណៈកម្មាធិការទទួលបន្ទុកកិច្ចការព្រំដែន លោក វ៉ា គឹមហុង បានថ្លែងថាសន្ធិសញ្ញាបំពេញបន្ថែមឆ្នាំ២០០៥ដែល រដ្ឋាភិបាលកម្ពុជានិងវៀតណាមបានចុះហត្ថលេខារួមគ្នា អនុញ្ញាតឲ្យភាគីទាំងពីរគូសចម្លងខ្សែព្រំដែនពីផែនទីបោន ១/១០០.០០០មកលើផែនទីUTM១/៥០.០០០ ដើម្បីជាជំនួយដល់ក្រុមបច្ចេកទេសយកមកអនុវត្តនៅលើដី ជាក់ស្តែង។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលអះអាងថាកម្ពុជាបាត់បង់ទឹកដីឲ្យវៀតណាម មានប្រសាសន៍ថាកម្ពុជាអាចយកសារាចររបស់អគ្គទេសាភិបាលឥណ្ឌូចិនមុនឆ្នាំ១៩ ៣៣មកប្រើបានទាក់ទងនឹងតំបន់ដាក់ហូតដាក់ដាំ ដោយថារដ្ឋធម្មនុញ្ញកម្ពុជាបានចែងតែការប្រើប្រាស់ផែនទីតែប៉ុណ្ណោះ ៕
