ដោយ ៖ ប៉ែន សុផល
ខេត្តបាត់ដំដំបង ៖ ក្រុមអាជីករផ្សារដំណាក់ស្តៅ ស្រុករតនះមណ្ឌលចំនួន១១នាក់បានលើកគ្នាមកដល់សាលាខេត្តបាត់ដំបងសុំអោយអាជ្ញាធរខេត្តជួយអន្តរាគមន៍អោយបានតូបចូលលក់វិញនៅលើចំណតរថយន្តសាងសង់ថ្មី។
អ្នកស្រីអន សៀងបូរី អតីតអាជីករលក់ម្ហូបអាហារក្នុងទីតាំងចំណតរថយន្តចាស់បានលើកឡើងនៅល្ងាចថ្ងៃទី១២ កក្តដានេះថា ពួកគាត់មានគ្នាចំនួន១១នាក់តំណាងអោយអាជីករ៨គ្រួសារធ្វើដំណើរមកសាលាខេត្តបាត់ដំបងដើម្បីសុំអោយឯកឧត្តម ចន្ទ័ សុផល អភិបាលខេត្តជួយដោះស្រាយបញ្ហាមិនមានកន្លែងលក់ដូរ ក្រោយពីក្រុមហ៊ុនវិនិយោគផ្សារសាង់សង់រួចរាល់ហើយដាក់សាច់ញាតិនិងក្រុមគ្រួសាររបស់មន្ត្រីសាលាស្រុកចូលដាក់ឥវ៉ាន់លក់មិនមានឈ្មោះពួកគាត់។
អាជីករអ្នកស្រី ង៉ែត ចន្ថា អាយុ៧៦ឆ្នាំបានប្រាប់សារព័ត៌មានមេគង្គប៉ុស្តិ៍ អោយដឹងដែរថា មូលហេតុធំដែលបង្ខំអោយពួកគាត់លើកគ្នាទាំងអស់មកនេះដោយសារតែការព្រួយបារម្មណ៍ ព្រោះក្រោយពីការសម្របសម្រួលដោយមន្ត្រីសាលាខេត្តនៅព្រឹកថ្ងៃទី១២ កក្តដានេះតម្រូវអោយអ្នកចូលលក់ថ្មីជាសាច់ញាតិម្ចាស់ក្រុមហ៊ុនផ្អាកការនាំទំនិញចូលក្នុងតូប ប៉ុន្តែក្រោយពីមន្ត្រីសាលាខេត្តចេញផុតអ្នកលក់ថ្មីជញ្ជូនឥវ៉ាន់ដាក់លក់ឡើងវិញ ខ្លាចក្រែងចូលលក់បានហើយមិនងាយចេញវិញ។
ការលើកគ្នាសុំអោយអាជ្ញាធរខេត្តជួយអន្តរាគមន៍នាមុខសាលាខេត្តនេះត្រូវបានលោក ឆាយ ម៉ាទីណាល់ នាយករងរដ្ឋបាលសាលាខេត្តគ្រាមកជួបជាមួយក្រុមអាជីករបានសុំអោយក្រុមអាជីករទាំងអស់ត្រឡប់ទៅកាន់លំនៅដ្ឋានរៀងៗខ្លួនវិញសិន ទុកពេលអោយអាជ្ញាធរស្រុកឬខេត្តរកដំណោះស្រាយជូន។
គួរបញ្ជាក់ថា នៅអំឡុងដើមខែមករា ឆ្នាំ២០១៧ កន្លងមកនេះអាជ្ញាធរស្រុកនិងម្ចាស់ក្រុមហ៊ុនវិនិយោគផ្សារដំណាក់ស្តៅបានស្នើរសុំអោយអាជីករចំនួន១១តូបរុះរើតូបចេញសិន ដោយសន្យាថាក្រោយពីការរៀបចំសាងសង់អោយមានរបៀបថ្មីហើយនិងអោយក្រុមអាជីករទាំងអស់ចូលលក់ដូចធម្មតាវិញ ប៉ុន្តែជាក់ស្តែងក្រោយពីក្រុមហ៊ុនវិនិយោគរៀបចំរួចបានដាក់អ្នកផ្សេងថ្មីអោយចូលលក់ទៅវិញទើបមានការតវ៉ាជាបន្តបន្ទាប់ដល់អាជ្ញាធរស្រុក និងចុងក្រោយដល់អាជ្ញាធរខេត្ត៕
