ស្វាយរៀង៖ ក្មេងស្រីម្នាក់ជាកូនម្ចាស់ ផ្ទះបានស្លាប់ក្នុងគំនរភ្លើងគួរឲ្យរន្ធត់ និងសម្ភារៈមួយចំនួនធំត្រូវខូចខាតទាំងស្រុងក្នុងហេតុការណ៍គ្រោះអគ្គិភ័យមួយដែលឆេះផ្ទះមួយខ្នងធ្វើអំពីឈើ ប្រក់ក្បឿង ។
ហេតុការណ៍នេះ បានកើតឡើង កាលពីវេលាម៉ោង ១២និង៣០នាទី រំលងអាធ្រាត្រ ឈានចូលថ្ងៃទី២៣ ខែឧសភា ឆ្នាំ២០១៥ ស្ថិតនៅភូមិព្រៃរកា ឃុំឈើទាល ស្រុកស្វាយជ្រំ ខេត្តស្វាយរៀង។
សមត្ថកិច្ចមូលដ្ឋាន បានឲ្យដឹងថា ក្មេងស្រីដែលស្លាប់ ក្នុងហេតុការណ៍អគ្គិភ័យ ឈ្មោះ គឹម ចាន់ថន អាយុ៧ឆ្នាំ ជាកូនស្រីម្ចាស់ផ្ទះរងគ្រោះ។ ចំពោះសម្ភារៈដែលបាត់បង់ មានរថយន្តសាំយ៉ុង២គ្រឿង ដែលចតនៅក្រោមផ្ទះ ម៉ូតូ២គ្រឿង ស្រូវ អង្ករ និងលុយកាក់មួយចំនួនធំ ត្រូវឆេះអស់។
ចំពោះមូលហេតុដែលបណ្តាលឲ្យមានអគ្គិភ័យ ឆាប់ឆេះ និងឆក់ជីវិតក្មេងស្រី និងសម្ភារៈនេះ ត្រូវបានមន្ត្រីជំនាញអះអាងថា គឺបណ្តាលមកពីទុស្សេចរន្តអគ្គិសនី ទើបបណ្តាលឲ្យមានភ្លើងឆាបឆេះឡើង។ ជាជំហានដំបូងសមត្ថកិច្ចមិនទាន់សន្និដ្ឋានពីទំហំនៃការខូចខាតអស់ ប៉ុន្មាននៅឡើយទេ ដោយមន្ត្រីជំនាញកំពុងធ្វើកំណត់ហេតុនៅព្រឹកថ្ងៃទី
២៣នេះ៕
