កណ្តាល៖ ស្ត្រីម្នាក់បានស្លាប់ និងម្នាក់ ទៀតរងរបួសធ្ងន់ ដោយជនមិនស្គាល់ មុខមានគ្នីគ្នា២នាក់ បានប្រើកាំភ្លើង K59 បាញ់ចំនួន៣គ្រាប់ ទៅលើអ្នកដំណើរ បណ្តាលឲ្យស្ត្រីម្នាក់ស្លាប់ និងស្ត្រីម្នាក់ទៀតរងរបួសធ្ងន់។
ករណីឃាតកម្មដែលអាថ៌កំបាំងនេះ បានកើតឡើងកាលពីវេលាម៉ោង ៨ និង១០នាទីយប់ថ្ងៃទី២៤ ខែឧសភា ឆ្នាំ២០១៥ នៅផ្លូវជាតិលេខ២១A (ចំណុចផ្លួវចូលរោងចក្រយ៉ុងវ៉ាថ្មី) ស្ថិតក្នុងភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។
នគរបាលក្រុងតាខ្មៅ បានឲ្យដឹងថា ជនរងគ្រោះចំនួន២នាក់ ម្នាក់ឈ្មោះ ទ្រី សុធាវី ភេទស្រី អាយ៣២ឆ្នាំ ទីលំនៅ ផ្ទះជួល ភូមិស្វាយរលំ ស្រុកស្អាង ខេត្តកណ្តាល មុខរបរ ប្រធានផ្នែករោងចក្រ Cambo Hongxing (ស្លាប់ដោយសារជនល្មើសបាញ់) និងម្នាក់ទៀតឈ្មោះ សេង ស្រីលាភ ភេទស្រី អាយុ២១ឆ្នាំ ស្នាក់នៅ ភូមិលេខ១ ឃុំស្វាយរលំ ស្រុកស្អាង ខេត្តកណ្តាល មុខរបរ កម្មការិនីរោងចក្រ Cambo Hongxing (របួសជើងស្តាំ ដោយសារដួលម៉ូតូ) ។ រីឯជនល្មើស២នាក់ ភេទប្រុស ជិះម៉ូតូម៉ាក VIVA ពណ៌ខ្មៅ សេរី២០០៨ មិនស្គាល់អត្តសញ្ញាណ គេចខ្លួនបាត់ ក្រោយបាញ់ជនរងគ្រោះ ។
នគរបាលបានឲ្យដឹងទៀតថា នៅកន្លែងកើតហេតុ សមត្ថកិច្ច រកឃើញសំបកគ្រាប់កាំភ្លើង K59 បាញ់រួច ៣គ្រាប់ និងម៉ូតូជនរងគ្រោះ ម៉ាក Scoopy ស្លាកលេខភ្នំពេញ 1CS 2933។
សាក្សីនៅកន្លែងកើតហេតុ បានឲ្យដឹងថា នៅវេលាកើតហេតុខាងលើ មានជនល្មើស២នាក់ បានជិះម៉ូតូកៀរជនរងគ្រោះ ហើយនិយាយថា ឈប់ៗ រួចក៏បាញ់ចំនួន១គ្រាប់ចំជនរងគ្រោះទី១ (អ្នកបើកម៉ូតូ) បណ្តាលឲ្យម៉ូតូរបស់ជនរងគ្រោះ រេចង្កូតហើយជនសង្ស័យបានបាញ់បន្ថែម ចំនួន២គ្រាប់ទៀត ធ្វើឲ្យម៉ូតូជនរងគ្រោះដួលនៅនឹងកន្លែង បន្ទាប់មកជនសង្ស័យ បានជិះម៉ូតូគេចខ្លូនបាត់ ។
នគរបាលបានបញ្ជាក់ថា តាមការសន្និដ្ឋានរបស់ សមត្ថកិច្ចជំហានដំបូងសង្ស័យជារឿងគំនុំ ដោយសាររឿងវិវាទការងារ។ កិច្ចការនេះ សមត្ថកិច្ចកំពុងចាត់វិធានការ ស្រាវជ្រាវ និងស៊ើបអង្កេត និងបន្តចាត់ការតាមនីតិវិធី៕
ស្លាកស្នាមលើសពស្រ្តីជនរងគ្រោះ
ស្រ្តីរងគ្រោះដែលរងរបួស
