ភ្នំពេញ-អគ្គីភ័យបានឆាបឆេះផ្ទះ មួយកន្លែងបង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គីភ័យចេញជួយអន្តរាគមន៍បាញ់ទឹកពន្លត់។
ហេតុការណ៍នេះបានកើតឡើងនៅវេលាម៉ោង ១០និង៤៥នាទីព្រឹក ថ្ងៃទី២៦ ខែមករា ឆ្នាំ២០២៥ ដែលស្ថិតចំណុចផ្ទះលេខ១៥z ផ្លូវ១៦២z ភូមិ៥ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។
ទទួលបានសេចក្ដីរាយការណ៍ពីអាជ្ញាធរ លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គីភ័យ និងសង្គ្រោះ នៃស្នងការដ្ឋាននគរ បាលរាជធានីភ្នំពេញ បានដឹកនាំបញ្ជាផ្ទាល់ដល់កងកម្លាំងពន្លត់អគ្គីភ័យដែលប្រចាំការនៅគ្រប់បណ្តាគោលដៅទាំងអស់ ចេញជួយអន្តរាគមន៍បាញ់ទឹកពន្លត់បានទាន់ពេលវេលា មិនបណ្ដាលឲ្យឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះឡើយ។
នៅក្នុងប្រតិបត្តិការនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គីភ័យចំនួន៨គ្រឿង ក្នុងនោះរួមមាន រថយន្តពន្លត់អគ្គីភ័យរបស់ការិយាល័យរាជធានីភ្នំពេញ ចំនួន៦គ្រឿង ប្រើប្រាស់ទឹកអស់៦ឡាន ស្មើនឹង២៤ម៉ែត្រគូប។
ផ្ទះដែលរងអគ្គីភ័យគឺជាប្រភេទសំណង់ថ្មបេតុង ទំហំ (៤,៦ម៉ែត្រ x ១៥ម៉ែត្រ) ដោយត្រូវឆេះបន្ទប់ជាន់ទី១ទំហំ (៣ម៉ែត្រ × ៤ម៉ែត្រ) ខូចខាតសម្ភារៈប្រើប្រាស់ប្រចាំថ្ងៃ នឹងគ្រឿងបន្លាស់រថយន្តមួយចំនួន។គ្រោះអគ្គីភ័យនេះ ត្រូវបានកម្លាំងសមត្ថកិច្ចជំនាញ ធ្វើការបាញ់ពន្លត់ជាស្ថាពរ នៅវេលាម៉ោង ១១និង២០នាទីព្រឹកនាថ្ងៃដដែល។
ចំពោះហេតុការណ៍គ្រោះអគ្គីភ័យនេះ កម្លាំងសមត្ថកិច្ចជំនាញបានធ្វើការស្រាវជ្រាវរកឃើញថា គឺបណ្តាលមកពីការឆ្លងចរន្តអគ្គីសនីបង្ករជាអគ្គីភ័យ។ ដោយឡែក នៅក្នុងហេតុការណ៍គ្រោះអគ្គីភ័យនេះ មិនបណ្តាលឲ្យអ្នកណាម្នាក់រងរបួសនោះឡើយ៕
សូមចុច Link ដើម្បីទស្សនាព័ត៌មានពិស្ដារ៖ https://www.facebook.com/share/v/19RBeAGTB1/
