ភ្នំពេញ៖ ព្រះសង្ឃ យុវជន និងប្រជាសហ គមន៍មានជម្លោះដីធ្លីរាប់រយ អង្គ.នាក់ បានប្រមូលផ្តុំគ្នាមុខស្ថានទូតបារាំងនៅខាងលិចគល់ស្ពានជ្រោយចង្វា ប្រយោជន៍ជំរុញឲ្យរាជរដ្ឋាភិបាល និងប្រទេសក្នុងហត្ថលេខីពិនិត្យមើលការអនុវត្តលើខ្លឹមសារសន្ធិសញ្ញា ទីក្រុងប៉ារីស ២៣ តុលា ឆ្នាំ១៩៩១ ដើម្បីបញ្ឈប់ការបណ្តេញប្រជាពលរដ្ឋចេញពីលំនៅឋាន និងធានាបូរណភាពទឹកដី។
អ្នករាយការណ៍ព័ត៌មានបានឲ្យដឹងថា នាព្រឹកថ្ងៃទី២៣ ខែតុលានេះ ក្រុមយុវជន ព្រះសង្ឃ និងប្រជាសហគមន៍ដែលមកជួបជុំគ្នានៅមុខស្ថានទូតបារាំង ក្នុងរាជធានីភ្នំពេញបានលើកបដា និងថ្លែងសារជំរុញឲ្យប្រទេសបារាំង ដាក់សម្ពាធឲ្យកម្ពុជា និងប្រទេសជាភាគីហត្ថលេខីនៃសន្និសញ្ញាទីក្រុងប៉ារីសផ្សេងទៀត អនុវត្តឲ្យបានត្រឹមត្រូវនៃខ្លឹមសារសន្ធិសញ្ញានោះ។ ប្រជាសហគមន៍លើកឡើងថា បច្ចុប្បន្នកម្ពុជានៅតែទទួលការរំលោភឈ្លានពានទឹកដីពីប្រទេសជិតខាងរួមមាន វៀតណាម និងថៃ ចំណែកនៅក្នុងប្រទេសវិញការរំលោភសិទ្ធិមនុស្សបណ្តេញប្រជាពលរដ្ឋចេញពីលំនៅដ្ឋានជាច្រើនកន្លែងដែរ។
គួរជម្រាបថា សន្និសញ្ញាទីក្រុងប៉ារីសធានានូវសន្តិភាព ការគោរពសិទ្ឋិមនុស្ស និង បូរណភាពទឺកដីកម្ពុជាដែលក្នុងនោះក៏មានប្រទេសបារាំង និងឥណ្ឌូនេស៊ី ជាសហប្រធាននៃសន្ធិសញ្ញាទីក្រុងប៉ារីស កាលពីថ្ងៃទី២៣ តុលា ឆ្នាំ១៩៩១នេះ។
តាមគម្រោងក្រោយពេលជួបជុំគ្នា ប្រជាសហគមន៍នឹងហែក្បួនយកញត្តិទៅដាក់នៅស្ថានទូតចំនួន៨ ក្នុងចំណោមប្រទេសទាំង១៨ នៃភាគីហត្ថលេខីនៃសន្ធិសញ្ញាទីក្រុងប៉ារីស ២៣ តុលា ក្នុងនោះរួមមានទូតបារាំង អាមេរិក ជប៉ុន រុស្ស៊ី និងចិនជាដើម។
ប៉ុន្តែនៅរសៀលក្នុងថ្ងៃដដែលនេះដែរ សាលារាជធានីភ្នំពេញបានសេចក្តីប្រកាសថ្កោលទោសចំពោះអ្នកដឹកនាំរៀបចំពិធីដង្ហែក្បូនរំលឹកខួបលើកទី២៣ នៃកិច្ចព្រមព្រៀងសន្តិភាពទីក្រុងប៉ារី ដែលបានប្រព្រឹត្តិខុសផ្ទុយពីការពិភាក្សា និងការសន្យាជាមួយសាលាក្រុង ព្រោះអាជ្ញាធរបានអនុញ្ញាតឲ្យត្រឹមប្រារព្ធពិធីនៅទីលានប្រជាធិបតេយ្យប៉ុណ្ណោះ ដោយមិនឲ្យមានការដង្ហែក្បួននោះឡើយ តែផ្ទុយទៅវិញអ្នករៀបចំប្រារព្ធពិធីបានពង្រីកការជួបជុំនៅបរិវេណមុខស្ថានទូតបារាំង លើសួនច្បារ និងលើទ្រូងផ្លូវ នៃកំណាត់មហាវិថីព្រះមុនីវង្ស ព្រមទាំងបិទផ្លូវសាធារណៈ បង្កឲ្យមានការកកស្ទះចរាចរណ៍យ៉ាងខ្លាំង និងគ្រោងដង្ហែក្បួនថែមទៀតផង៕ ជំនិត
ប្រជាពលរដ្ឋលើកបដាដើម្បីរំឭកដល់ថ្ងៃសន្ធិសញ្ញាក្រុងប៉ារីស ២៣ តុលា ១៩៩១
