ខេត្តប៉ៃលិន៖ អំពើឃាតកម្មដ៏សែនយង់ឃ្នងលើមនុស្សមួយគ្រួសារមានប្តី-ប្រពន្ធ ព្រមទាំងកូនតូច ដោយជនមិនស្គាល់មុខបានលួចដុតផ្ទះសម្លាប់ កាលពីវេលារំលងអាធ្រាត្រឈាន ចូលថ្ងៃទី២១ ខែវិច្ឆិកា ឆ្នាំ២០១៤ នៅខេត្តប៉ៃលិន ដែលគេពុំដឹងថាមានការពាក់ព័ន្ធទៅនឹងគំនុំអ្វីខ្លះនោះទេ។
របាយការណ៍របស់អាជ្ញាធរមូលដ្ឋានបានឱ្យដឹងថា ករណីឃាតកម្ម បិទមុខខាងលើនេះ បានកើតឡើងលើក្រុមគ្រួសារស្មៀនឃុំម្នាក់ដែលមានលំនៅឋាន ស្ថិតក្នុងភូមិកូនដំរី ឃុំអូរអណ្តូង ស្រុកសាលាក្រៅ ខេត្តប៉ៃលិន។ ស្មៀនឃុំរងគ្រោះមានឈ្មោះ ហេង រ៉ាវី អាយុ២៧ឆ្នាំ ដែលបម្រើការនៅឃុំសាលាក្រៅ ស្រុកសាលាក្រៅ ខេត្តប៉ៃលិន។
របាយការណ៍បង្ហាញថា នៅវេលាម៉ោង១ និង១៥នាទីយប់ឈានចួលថ្ងៃទី២១ ខែវិច្ឆិកា មនុស្សមួយគ្រួសាររបស់ស្មៀនឃុំដែលមានចំនួន ៣នាក់ រួមទាំងប្រពន្ធម្នាក់ឈ្មោះ ធី ផល្លៃ និងកូនប្រុសអាយុ៦ខែ ឈ្មោះ ហេង ម៉េងជូ ត្រូវបានឃាតករសម្លាប់ដោយយកខ្សែលួសចងក ហើយដុតទាំងមនុស្ស និងផ្ទះជាមួយគ្នាបន្ថែមទៀត ដើម្បីបង្វែរកាចាប់អារម្មណ៍។
ប៉ុន្តែទោះជាយ៉ាណាក្តីក៏សមត្ថកិច្ចបានសន្និដ្ឋានជំហានដំបូងថា ករណីអគ្គិភ័យដែលឆេះផ្ទះនិងស្លាប់មនុស្សទាំងគ្រួសារខាងលើនេះ វាមិនមែនជារឿងឧប្បត្តិហេតុគ្រោះអគ្គិភ័យនោះឡើយ គឺជារឿងឃាតកម្ម ព្រោះនៅលើសាកសពគេឃើញមានខ្សែលួសជាប់នឹង ក។
សមត្ថកិច្ចមិនទាន់អះអាងជាក់លាក់នៅឡើយទេ ដោយគ្រាន់តែចុះទៅដល់កន្លែងកើតហេតុប្រមូលវត្ថុតាង និងធ្វើកោសល្យវិច្ច័យទៅលើសាកសពដែលបានស្លាប់ឆេះរួញនៅជាប់ៗ គ្នាលើគំនរផេះផង់ប៉ុណ្ណោះ ប៉ុន្តែសមត្ថកិច្ចបង្ហើបឲ្យដឹងថា កំពុងស៊ើបអង្កេតយ៉ាងយកចិត្តទុកដាក់ដើម្បីនាំយកជនល្មើសមកផ្តន្ទាទោសតាមច្បាប់៕
