ភ្នំពេញ៖ លោកស្រី សម មុន្នីកា ដែលបានប្តឹង ជំរិតទារលុយពីអ្នកបើករថយន្តឈ្នួលម្នាក់ចំនួន ៤០០០ដុល្លារអាមេរិកទៅខេត្តរតនគិរីនោះ ត្រូវបានដកតំណែង បញ្ចប់តួនាទីពីរដ្ឋលេខាធិការក្រសួងទេសចរណ៍ តាមព្រះរាជក្រឹត្យរបស់ព្រះមហាក្សត្រ ចុះថ្ងៃទី១៩ ខែវិច្ឆិកា ឆ្នាំ២០១៤។
ព្រះរាជក្រឹត្យរបស់ព្រះមហាក្សត្រ ដែលគេផ្សព្វផ្សាយនៅល្ងាចថ្ងៃទ២១ ខែវិច្ឆិកានេះ ព្រះករុណា បានត្រាស់ បង្គាប់ បញ្ចប់មុខតំណែងលោកស្រី សម មុន្នីកា ពីរដ្ឋលេខាធិការក្រសួងទេសចរណ៍ ដោយសាម៉ីខ្លួនសុំលាលែង យោងតាមសេចក្តីក្រាបទូលថ្វាយពីលោកនាយករដ្ឋមន្ត្រី ហ៊ុន សែន។
គួររំលឹកថា កាលពីដើមខែវិច្ឆិកានេះ លោកស្រី សម មុន្នីកា ដែលជាភរិយារបស់លោក ប៉ុល លឹម រដ្ឋលេខាធិការក្រសួងមហាផ្ទៃ បានប្តឹងទាមទារជំងឺចិត្តពីអ្នកបើករថយន្តឈ្នួលភ្នំពេញ ទៅខេត្តរតនគិរីម្នាក់ ឈ្មោះ ខឹម ពិសិដ្ឋ ចំនួន ៤០០០ដុល្លារ ជាសំណងជំងឺចិត្ត ដោយសារតែរថយន្តឈ្នួលនោះបានខូចដាច់កាឡេរេចង់ធ្លាក់ផ្លូវធ្វើឲ្យលោកស្រីភិតភ័យ។
ក្រោយមក កាកបាទក្រហមកម្ពុជា បានប្រកាសបដិសេធមិនទទួលលុយ ៤០០០ដុល្លារ របស់លោកស្រី សម មុន្នីកា។ កាកបាទក្រហមកម្ពុជា បានផ្តល់ឲ្យអ្នកបើកឡានឈ្នួលនោះ ២០០០ដុល្លារ ដើម្បីជួសជុលរថយន្ត។
ការប្រកាសនេះ បានធ្វើឡើងតាមបណ្តាញ Facebook មួយចំនួនបានអះអាងថា លោកស្រីដែលជាភរិយាមន្ត្រីជាន់ខ្ពស់ នៅក្រសួងមហាផ្ទៃម្នាក់រូបនេះ បានយកលុយ ២០០០ដុល្លារ ទៅជូនមន្ទីរពេទ្យគន្ធបុប្ផា។ ចំណែក ២០០០ដុល្លារទៀត ដែលបានមកពីម្ចាស់រថយន្តឈ្នួល មិនត្រូវបានបញ្ជាក់ថា លោកស្រី សម មុន្នីកា យកទៅណានោះទេ៕
លោក ផែង វណ្ណះ និង លោក ព្រំ សាន្ត ដែលជាតំណាម្ចាស់រថយន្ត រត់តាក់ស៊ី បានរៃអង្គាសប្រាក់គ្នាចំនួនបួនពាន់ដុល្លារ យកទៅប្រគល់ជូនលោកស្រី សម មុន្នីកា នៅការិយាល័យស្ថិតនៅទីស្ដីការក្រសួងទេសចរណ៍ កាលពីសៀលថ្ងៃទី១១ ខែវិច្ឆិកា ឆ្នាំ២០១៤(រូបៈFacebookលោក ផែង វណ្ណះ)
