ដោយ៖ប៊ុនថេត
ភ្នំពេញ៖ឯកឧត្តម ឯក វីរដេដ្ឋ ដែលត្រូវជាកូនប្រុសបង្កើតរបស់ឯកឧត្តម ឯក សំអុល សមាជិកគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមប្រឹក្សាធម្មនុញ្ញ ត្រូវបានដកហូតមុខតំណែងហើយ ដោយព្រះរាជក្រឹត្យលេខនស/រកត/០៥១៦/៥៥៨ ចុះថ្ងៃទី២៧ ខែឧសភា ឆ្នាំ២០១៦។
កន្លងមក មានការខ្សឹបខ្សៀវជាច្រើនពាក់ព័ន្ធនឹងឯកឧត្តម ឯក វីរដេដ្ឋ អគ្គាធិការនៃអគ្គាធិការដ្ឋាននៃក្រសួង សេដ្ឋកិច្ចនិងហិរញ្ញវត្ថុ ថាជាមន្ត្រីដ៏មានឥទ្ធិពល និងទ្រព្យសម្បត្តិមហាសាល ប៉ុន្តែក៏ល្បីល្បាញខាងរងការរិះគន់ពីសំណាក់មន្ត្រីរាជការក្រោមឱវាទរឿងពុករលួយ ផងដែរ។
ចន្លោះតំណែងមេអធិការកិច្ចក្រសួងហិរញ្ញវត្ថុនេះ ត្រូវបានដាក់ជំនួសដោយឯកឧត្តម ឆាយ រតនៈ វិញ (ឯកឧត្តម ឆាយ រតនៈ ធ្លាប់ទទួលបានការតែងតាំងជាជំនួយការឯកឧត្តម រស់ សីលវ៉ា សមាជិកឧត្តមក្រុមប្រឹក្សាសេដ្ឋកិច្ចជាតិ មានឋានៈស្មើអគ្គនាយកបន្ថែមលើមុខងារបច្ចុប្បន្ន ដោយព្រះរាជក្រឹត្យលេខនស/រកត/០៦១៥/៦១៤ ចុះថ្ងៃទី១០ ខែមិថុនា ឆ្នាំ២០១៥) ។
ទោះបីបាត់បង់តំណែងជាអគ្គាធិការ នៃអគ្គាធិការដ្ឋានក្រសួងសេដ្ឋកិច្ចនិងហិរញ្ញវត្ថុ ដែលមានឯកឧត្តម អូន ព័ន្ធមុនីរ័ត្ន ជាទេសរដ្ឋមន្ត្រី និងរដ្ឋមន្ត្រីក៏ដោយ ក៏ឯកឧត្តម ឯក វីរដេដ្ឋ ត្រូវបានតែងតាំងមុខតំណែងថ្មីជាអនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុយ៉ាងហ៊ឺហាដដែល ខណៈអនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បច្ចុប្បន្នមានចំនួន១៨នាក់ រួចហើយនោះ។
សូមជម្រាបថា ឯកឧត្តម ឯក វីរដេដ្ឋ ទទួលបានការតែងតាំងជាអគ្គាធិការនៃអគ្គាធិការដ្ឋានក្រសួងសេដ្ឋកិច្ច និងហិរញ្ញវត្ថុ ដោយព្រះរាជក្រឹត្យលេខនស/រកត/១០១៣/១០៤៧ ចុះថ្ងៃទី២៤ ខែតុលា ឆ្នាំ២០១៣ (ក្រោយការបង្កើតរាជរដ្ឋាភិបាលនីតិកាលទី៥នៃរដ្ឋសភា) ។ ក្រោយមក ឯកឧត្តម ឯក វីរដេដ្ឋ ទទួលបានការតែងតាំងជាទីប្រឹក្សាឧត្តមក្រុមប្រឹក្សាសេដ្ឋកិច្ចជាតិ មានឋានៈស្មើរដ្ឋលេខាធិការ បន្ថែមលើមុខងារបច្ចុប្បន្ន តែមិនទទួលប្រាក់បំណាច់ប្រចាំខែ ដោយព្រះរាជក្រឹត្យលេខនស/រកត/០៦១៥/៦១៥ ចុះថ្ងៃទី១០ ខែមិថុនា ឆ្នាំ២០១៥ ៕
