ភ្នំពេញ៖ លោកឧកញ៉ា អ៊ឺង ម៉េងជឺ ថៅកែហាងពេជ្រហុងកុង និងជាថៅកែអគារលក់គ្រឿងសំណង់ហេង ហុងសេង ត្រូវខ្មាន់កាំ ភ្លើង២នាក់ បាញ់ដោយកាំភ្លើងខ្លីជាច្រើនគ្រាប់បណ្តាលឱ្យដួលស្លាប់នៅនឹងកន្លែងកើតហេតុនៅចំណុចមុខហាងលក់ផ្លែឈើខាងលិចស្តាតអូឡាំពិក ខណៈជនរងគ្រោះចុះពីលើរថយន្តបម្រុងដើរចូលទិញផ្លែឈើ។
ហេតុការណ៍គួរឲ្យរន្ធត់នេះ បានកើតឡើងកាលពីវេលាម៉ោងជាង៧យប់ ថ្ងៃទី២២ ខែវិចិ្ឆកា ឆ្នាំ២០១៤ នៅចំណុចមុខហាងលក់ផ្លែឈើយីហោ ឡោតិចសេង ផ្ទះលេខ៤៦៤BE0 កែងផ្លូវលេខ២៧៤ ស្ថិតក្នុងសង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ។
សមត្ថកិច្ចមូលដ្ឋានបានឲ្យដឹងថា ជនរងគ្រោះមានឈ្មោះ អ៊ឹង ម៉េងជឺ អាយុជាង៤០ឆ្នាំ ជាថៅកែហាងពេជ្រហុងកុង នៅជិតផ្សារថ្មី បើករថយន្តម៉ាកតូយ៉ូតាឡិចស៊ីស៥៧០ ពណ៌ឈាមជ្រូក ភ្នំពេញ 2M-1683។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ ជនរងគ្រោះបានបើករថយន្តម៉ាកឡិចស៊ីស៥៧០ ពណ៌ក្រហមមួយគ្រឿងតែម្នាក់ឯង តាមបណ្តោយផ្លូវលេខ២៧៤ ពេលមកដល់មុខហាង លក់ផ្លែឈើ ឡោតិចសេង ក្បែររបងស្តាតអូឡាំពិក ជនរងគ្រោះបានចុះពីលើរថយន្តដើរបានប្រហែល៣ម៉ែត្រប៉ុណ្ណោះ ស្រាប់តែមានខ្មាន់កាំភ្លើងពីរនាក់ជិះម៉ូតូហុងដាឌ្រីមសេ១២៥ មួយគ្រឿងមកដល់ឈប់អែបជនរងគ្រោះហើយបានដកកាំភ្លើងខ្លីម៉ាកឡុក CZ98 បាញ់សំដៅទៅស្រោចមកលើជនរងគ្រោះជាច្រើនគ្រាប់បណ្តាលឱ្យស្លាប់ភ្លាមនៅនឹងកន្លែងកើតហេតុ។ ក្រោយពីបាញ់ជនរងគ្រោះ ហើយជនសង្ស័យទាំង២នាក់បានបើកម៉ូតូគេចខ្លួនបាត់។
យ៉ាងណាក៏ដោយ សមត្ថកិច្ចនៅពុំបានអះអាងពីការធ្វើកោសល្យវិច័យលើសាកសពលោកឧកញ៉ាថា រងរបួសដោយគ្រាប់កាំភ្លើងប៉ុន្មានគ្រាប់នៅឡើយទេ ប៉ុន្តែនៅកន្លែងកើតហេតុសមត្ថកិច្ចបានរក ឃើញគ្រាប់កាំភ្លើងចំនួន៥គ្រាប់បានផ្ទុះ និង៣គ្រាប់មិនផ្ទុះ។
ក្រោយកើតហេតុសមត្ថកិច្ចចម្រុះខណ្ឌចំការមន បានចុះមកអន្តរាគមន៍នៅកន្លែងកើតហេតុ និងធ្វើកំណត់ហេតុ ដើម្បីឈានទៅកំណត់មុខសញ្ញាជនសង្ស័យខាងលើ។ ប៉ុន្តែជាជំហានដំបូលសមត្ថកិច្ចជំនាញសន្និដ្ឋានថា អាចជាករណីគំនុំដោយជនសង្ស័យបានគិតទុកជាមុន និងតាមពីក្រោយជនរងគ្រោះរហូតមកដល់ចំណុចកើតហេតុក៏បាញ់ប្រហារតែម្តង។
អ្នកធ្លាប់ស្គាល់ជនរងគ្រោះ លោក អ៊ឹង ម៉េងជឺ និងភរិយាលោកស្រី តាំង គឹមឆេង បានអះអាងថា លោកឧកញ៉ា និងភរិយា ជាអ្នកចូលចិត្តធ្វើបុណ្យទានដែលកន្លងមកក្រុមគ្រួសាររបស់លោកបានសង់ផ្ទះទេវតាជាច្រើនជូនជនចាស់ជរា និងគ្មានទីពឹងនៅក្នុងខេត្តបាត់ដំបង និងខេត្តប៉ៃលិន។លោកឧកញ៉ា អ៊ឹង ម៉េងជឺ និងភរិយា ពេលធ្វើដំណើរទៅណាមកណា មិនដែលមានអង្គរក្ស ឬអ្នកការពារនោះទេ ពោលទៅណាមក ណាមកណា តែពីរអ្នកភរិយាប៉ុណ្ណោះ។
សពលោកឧកញ៉ា អ៊ឹង ម៉េងជឺ ត្រូវបានយកទៅកម្តល់ធ្វើបុណ្យនៅគេហដ្ឋានរបស់លោកនៅភូមិ បាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
លោកឧកញ៉ា អ៊ឹង ម៉េងជឺ និង ភរិយា ពេលចុះប្រគល់ផ្ទះទេវតា ជូនចាស់ជរា
