ខេត្តប៉ៃលិន៖ជនសង្ស័យម្នាក់ក្នុងចំណោមមនុស្ស៣នាក់ ត្រូវសមត្ថកិច្ចបាញ់របួសជើងម្ខាង ខណៈ បានឃាត់ខ្លួនយកមកសាកសួរតែជននោះ បានរត់គេចពីសមត្ថកិច្ច ពាក់ព័ន្ធនឹងករណីឃាតកម្មដ៏សាហាវឃោរឃៅចាប់មនុស្សចងរួចដុតទាំងមនុស្សទាំងផ្ទះនៅខេត្តប៉ៃលិន។
មន្ត្រីសមត្ថកិច្ចបញ្ជាក់ឲ្យដឹងថា ជនសង្ស័យជាឃាតករដែលដុតផ្ទះសម្លាប់ស្មៀនឃុំសាលាក្រៅមួយគ្រួសារ ត្រូវសមត្ថកិច្ចស្រាវជ្រាវវែកមុខបានចាប់ឃាត់ខ្លួនបុរសម្នាក់ត្រូវជាបងសាច់ថ្លៃ និង មនុស្សប្រុស២នាក់ផ្សេងទៀតទៅសាកសួរ ពាក់ព័ន្ធករណីឃាតកម្មដ៏សារហាវនេះ ប៉ុន្តែខណៈដែលសមត្ថកិច្ចកំពុងសាកសួរត្រូវចំណុចស្រាប់តែជនសង្ស័យបានស្ទុះរត់គេចខ្លួន ហើយត្រូវកម្លាំងសមត្ថកិច្ចបាញ់ឱ្យរបួសជើងស្តាំ ទើបចាប់បាន។
ហេតុការណ៏៍ឃាត់ខ្លួននេះ បានធ្វើឡើងតាំងពីល្ងាចថ្ងៃទី២១ រហូតដល់ពេលរសៀលថ្ងៃទី២២ ខែវិច្ឆិកា ឆ្នាំ២០១៤ ស្ថិតនៅក្នុងភូមិអូរ៧៥ ឃុំអូរអណ្ដូង ស្រុកសាលាក្រៅ ខេត្តប៉ៃលិន។
សមត្ថកិច្ចបានសន្និដ្ឋានថា ជារឿងជម្លោះដណ្ដើមកេរមរតកច្រើនជាងករណីប្លន់សម្លាប់យក ទ្រព្យសម្បត្តិ។ជនសង្ស័យនៅពុំទាន់សាកសួរបាននៅឡើយដោយសារកំពុងព្យាបាលនៅមន្ទីរពេទ្យបង្អែក ប៉ៃលិននៅឡើយ។
ប្រភពបានឱ្យដឹងទៀតថា បុរសដែលសមត្ថកិច្ចបាញ់រងរបួសឈ្មោះឆោម ចំណាន អាយុ៣២ឆ្នាំ មានទីលំនៅក្នុងភូមិអូរ៧៥ ឃុំអូរអណ្តូង ស្រុកសាលាក្រៅ ដែលមានផ្ទះក្បែរកន្លែងកើតហេតុនោះ។
តាមសេចក្តីរាយការណ៍បានឲ្យដឹងថា បុរសម្នាក់ដែលគេស្គាល់ថា ជាស្មៀនឃុំសាលាក្រៅ ទើបចូលបម្រើការងារក្នុងមូលដ្ឋាននេះបានត្រឹមតែ៦ទៅ៧ខែ ត្រូវឃាតករមួយក្រុមមានគ្នាប្រមាណ៤នាក់ ជិះម៉ូតូ២គ្រឿង ចាប់ចងភ្ជាប់គ្នានឹងខ្សែភ្លើងទាំងប្តីប្រពន្ធ និងទារិកាជាកូនតូចអាយុទើបតែ៦ខែ នៅក្នុងផ្ទះ រួចចាក់សាំងដុតផ្ទះ បណ្តាលឱ្យឆេះស្លាប់ទាំងអស់គ្នាយ៉ាងអាណោចអាធ័មជាទីបំផុត។ ហេតុការណ៍គួរឱ្យរន្ធត់ និងព្រៃផ្សៃបំផុតនេះ បានកើតទ្បើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃ ទី២១ ខែវិច្ឆិកា នៅផ្លូវលំ ស្ថិតក្នុងភូមិអូរ៧៥ ឃុំអូរអណ្តូង ស្រុកសាលាក្រៅ។
របាយការន៍មន្ត្រីនគរបាលបង្ហាញថា ជនរងគ្រោះជាប្តីឈ្មោះ ហេង រ៉ាវី អាយុ២៧ឆ្នាំ ជាស្មៀនឃុំសាលាក្រៅ ប្រពន្ធឈ្មោះ ធី ផលទ្បៃ អាយុ២៤ឆ្នាំ ប្រកបរបរលក់គ្រឿងទេសនៅផ្ទះ និងទារិកាជាកូនឈ្មោះ ហេង ម៉េងជូ អាយុទើប៦ខែ ។ ក្រុមគ្រួសារនេះ មានស្រុកកំណើតនៅភូមិនិគម ឃុំនិគម ស្រុកថ្មគោល ខេត្តបាត់ដំបង បច្ចុប្បន្នរស់នៅក្នុងភូមិខាងលើ។
មន្ត្រីនគរបាលបានឱ្យដឹងទៀតថា បើតាមការសន្និដ្ឋាន គឺដាក់ការសង្ស័យ ៖
ទី១-ជារឿងទំនាស់រវាងក្រុមគ្រួសាររបស់ពួកគេដែលស្រទ្បាញ់ មិនស្មើគ្នា។ ទី២-ទាក់ទិនទៅនឹងមុខតំណែងស្មៀន ទើបតែទ្បើងថ្មី និងទី៣-ទាក់ទិនទៅនឹងការរកស៊ីបង្កើតស្តង់ពោតដំទ្បូងមី។
បើតាមព័ត៌មានឱ្យដឹងថា ជនរងគ្រោះទើបតែទៅខ្ចីលុយពីធនាគារចំនួន ៤ម៉ឺនដុល្លារអាមេរិក ដើម្បីយកប្រើប្រាស់ក្នុងមុខរបររបស់ខ្លួន កាលពីពេលល្ងាច ហើយលុយនេះត្រូវភ្លើងឆេះហ្មត់ទាំងអស់។
ប្រភពបានឱ្យដឹងទៀតថា ករណីនេះ គឺជារឿងគំនុំដណ្ដើមកេរអាករគ្នារវាងបងប្អូន ប៉ុន្តែជនសង្ស័យទំនងមិនមែនអាចធ្វើតែម្នាក់ឯងទេ គឺមានគ្នា។សមត្ថកិច្ចនគរបាលគ្រប់លំដាប់ថ្នាក់នៅក្នុងខេត្ត កំពុងស្រាវជ្រាវហៅមនុស្សប្រុស២នាក់ទៀត មកសាកសួរពាក់ព័ន្ធករណឃាតកម្មនេះ។
ការសម្លាប់ដោយចាប់ចងរួចដុតទាំងមនុស្សទាំងផ្ទះយ៉ាងឃោរឃៅនេះ បានបង្ហាញឱ្យឃើញនូវគំនុំដ៏ស្រួចស្រាល់មួយ តែអ្វីដែលគួរឱ្យថ្កោលទោសបំផុតនោះ គឺក្មេងតូចដែលមានអាយុទើបតែ៦ខែ មិនទាន់ដឹងក្តីផងនោះក៏ពួកគេចាត់ជាសត្រូវហើយចងដុតសម្លាប់ដែរ៕
