ភ្នំពេញ៖បុរសជាជនជាតិកូរ៉េម្នាក់បានប្រើ ល្បិចបង្កជាគ្រោះថ្នាក់ចរាចរណ៍សម្លាប់ប្រពន្ឋជាជនជាតិខ្មែរ និងកូនក្នុងផ្ចៃក្នុងគោលបំណងបានប្រាក់សំណងពីក្រុមហ៊ុនធានារ៉ាប់រងជីវិតរបស់ប្រពន្ឋ ដែលមានទឹកប្រាក់ប្រមាណជិត ៩លានដុល្លារអាមេរិក។
លោក កុយ គួង មន្ត្រីអ្នកនាំពាក្យក្រសួងការបរទេសកម្ពុជា បានប្រាប់អ្នកកាកាសែតថា ស្ថានអគ្គកុងស៊ុលកម្ពុជាប្រចាំនៅសាធារណរដ្ឋកូរ៉េបានឱ្យដឹងថា កាលពីថ្ងៃទី២៣ ខែសីហា ឆ្នាំ២០១៤ នៅប្រទេសកូរ៉េ មានខ្មែរមួយគ្រួសារបានជួបគ្រោះថ្នាក់ចរាចរណ៍ក្នុងនោះបណ្តាលឱ្យស្ត្រីម្នាកដែលមានផ្ចៃពោះ៧ខែស្លាប់នៅកន្លែងកើតហេតុ ហើយបុរសជាប្តីជាជនជាតិកូរ៉េរងរបួសស្រាល។
លោក កុយ គួង បានឲ្យដឹងថា ក្រោយពីកើតហេតុ នគរបាលប្រទេសកូរ៉េបានធ្វើការស្រាវជ្រាវរកមូលហេតុនៃគ្រោះថ្នាក់ចរាចរណ៍នោះ ហើយបានរកឃើញថា ប្តីជនជាតិកូរ៉េរូបនេះ មានចេតនាសម្លាប់ប្រពន្ឋជាជនជាតិខ្មែរ តាមរូបភាពគ្រោះថ្នាក់ចរាចរណ៍ ដើម្បីបានប្រាក់សំណងពីក្រុមហ៊ុនធានារ៉ាប់រងជីវិតរបស់ប្រពន្ឋ ដែលមានចំនួនជិត ៩លានដុល្លារអាមេរិក។
មន្ត្រីក្រសួងការបរទេសកម្ពុជា បញ្ជាក់ថា បច្ចុប្បន្ននេះ នគរបាលប្រទេសកូរ៉េបានចាប់ខ្លួនប្តីកំណាចឃោរឃៅនោះដើម្បីផ្តន្ទាទោស។ស្ត្រីខ្មែរដែលរងគ្រោះរហូតដល់បាត់បង់ជីវិតមានឈ្មោះ អ៊ី ស៊ីឡែន មានស្រុកកំណើតនៅភូមិក្តល់លើ ឃុំទ្រា ស្រុកក្រូចឆ្មារ ខេត្តត្បូងឃ្មុំ បានរៀបការនឹងរស់នៅជាមួយប្តីជនជាតិកូរ៉េនោះតាំងពីឆ្នាំ២០០៨ រហូតមកដល់ពេលនេះ មានកូនស្រីមួយអាយុ៥ឆ្នាំ និងកូនក្នុងផ្ទៃអាយុ៧ខែ នៅថ្ងៃកើតហេតុកូនស្រីអាយុ៥ឆ្នាំ មិនស្ថិតក្នុងរថយន្តជាមួយឱពុក-ម្តាយ ទេ។
លោកស្រី ប្រធានាធិបតីនៃសាធារណរដ្ឋកូរ៉េ មានការចាប់អារម្មណ៍យ៉ាងខ្លាំង ចំណែកក្រុមទូរទស្សន៍ប្រទេសកូរ៉េមួយចំនួន គ្រោងធ្វើដំណើរមកកម្ពុជាដើម្បីថត និងសម្ភាសន៍គ្រួសារសពស្ត្រីរងគ្រោះនៅខេត្តត្បូងឃ្មុំនាពេលខាងមុខនេះ។
ក្រសួងការបរទេស និងសហប្រតិបត្តការអន្តរជាតិ បានណែនាំស្ថានទូតកម្ពុជា ឱ្យប្តឹង ឬទាមទារសំណងជំងឺចិត្តជូនគ្រួសារសព និងសំណងសម្រាប់ចិញ្ចឹមកូនស្រីដែលរស់រានមានជីវិត៕ រដ្ឋា
លោក កុយ គួង កំពុងផ្តល់បទសម្ភាសន៍ ដល់អ្នកសារព័ត៌មាននានា
