បន្ទាយមានជ័យ៖ វិទ្យុជាតិ FMកម្រិត៩៤MHZ កម្លាំងផ្សាយ 5KW ដែលអាចឮដល់បណ្តាខេត្តខ្លះនៅជាប់ព្រំដែនខេត្តបន្ទាយមានជ័យ និងឮដល់តំបន់ខ្លះនៃទឹកដីថៃផងដែរនោះ ត្រូវបានសម្ភោធដាក់ឲ្យប្រើប្រាស់ជាផ្លូវការហើយ។
ពិធីសម្ពោធដាក់ឲ្យប្រើប្រាស់ផ្លូវការនូវវិទ្យុជាតិខេត្តបន្ទាយមានជ័យនេះ បានធ្វើឡើង កាលពីព្រឹកថ្ងៃទី២៩ ខែវិច្ឆិកា ឆ្នាំ២០១៤ ក្រោមវត្តមានលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន លោក គោស៊ុំ សារឿត អភិបាលខេត្តបន្ទាយមានជ័យ មន្ត្រីរាជកា ប្រជាពលរដ្ឋ សិស្សានុសិស្ស នៅក្នុងខេត្តជាច្រើននាក់។
លោក សេក សុខុម ប្រធាន មន្ទីរព័ត៌មានខេត្តបន្ទាយមានជ័យ បានថ្លែងក្នុងពិធីនោះថា ស្ថានីយវិទ្យុ FM ជាតិ កំរិត៩៤ MHZ ខេត្តបន្ទាយមានជ័យ ដែលមានកម្លាំងផ្សាយ ៥ KW នេះ ជាស្ថានីយវិទ្យុរបស់រដ្ឋដំបូងបង្អស់នៅខេត្តបន្ទាយមានជ័យ ដែលជាជំនួយរបស់វិទ្យុសម្លេងវៀតណាម (VOV) តាមរយៈរាជរដ្ឋាភិបាលកម្ពុជា និងក្រសួងព័ត៌មាន។
លោក សេក សុខុម បានបន្តថា ស្ថានីយវិទ្យុនេះ សាងសង់ក្នុងឆ្នាំ២០១១ និងការជ្រោមជ្រែងឧបត្ថម្ភពីថ្នាក់ដឹកនាំ និងសប្បុរសជន ក្នុងខេត្តលើដីទំហំ ២៧ម៉ែត្រ គុណ ២៨ម៉ែត្រ និងថែមដីសាលាក្រុងសិរីសោភ័ណ ១៦មគុណ ៦មទៀត។ ចំពោះអង់តែនវិទ្យុ កម្ពស់ ៧០ម ជាអំណោយមួយផ្នែកធំរបស់លោករដ្ឋមន្ត្រី ខៀវ កាញារីទ្ធ ត្រូវបានតម្លើងក្នុងខែកញ្ញា ឆ្នាំ២០១១ ហើយបន្ទាប់មកស្ថាបនាស្ទូយោ អគារ និងរបង។ វិទ្យុបានដំណើរការផ្សាយ សាកល្បង ចាប់ពីថ្ងៃទី១២ ខែមិនា ឆ្នាំ២០១៤ គឺផ្សាយកម្មវិធីផលិតខ្លួនឯង និងផ្សាយបន្តពីវិទ្យុជាតិពីរាជធានីភ្នំពេញ។
លោកប្រធានមន្ទីរ បន្ថែមថា ការផ្សាយវិទ្យុនេះ គ្របដណ្តប់ទូលាយពេញខេត្តបន្ទាយមានជ័យ ហើយដល់ប៉ែកខាងលិច និងខាងត្បូងខេត្តឧត្តមានជ័យ និងខេត្តសៀមរាប និងខាងលិចខេត្តបាត់ដំបង។ ក៏ឮដល់ខាងកើត និងឦសានខេត្តស្រះកែវប្រទេសថៃដែរ ហើយកម្មវិធីវិទ្យុនេះចាក់ផ្សាយ រយៈពេល ១៨ម៉ោង ក្នុង ១ថ្ងៃ ចាប់ពីម៉ោង ៨ព្រឹក ដល់ម៉ោង ២២យប់។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បាននិយាយថា វិទ្យុជាតិនេះ គឺជាវិស័យព័ត៌មាន ដែលជាឧបករណ៍មួយដ៏មានមានសារសំខាន់ណាស់ សម្រាប់ប្រជាពលរដ្ឋរស់នៅក្នុងខេត្ត និងការទទួលបាននូវសេវាព័ត៌មាន ច្បាស់លាស់គ្រប់ជ្រុងជ្រោយ និងបានលើកកំរិតការយល់ដឹងទាំងការកម្សាន្ត និងការយល់ដឹងរបស់ប្រជាពលរដ្ឋ នៅតាមសហគមន៍ទូទាំងខេត្ត។
សូមបញ្ជាក់ថា នៅខេត្តបន្ទាយមានជ័យមានវិទ្យុផ្សាយសំឡេង FM ជាង ១០ រួមមាន នៅក្រុងសិរីសោភ័ណ ស្រុកមង្គលបូរី ក្រុងប៉ោយប៉ែត និងស្រុកម៉ាឡៃ។ចំណែកទីតាំង ស្ថានីយវិទ្យុរដ្ខ FM ជាតិ កំរិត៩៤ MHZ កម្លាំងផ្សាយ 5KW និងទូរទស្សន៍ជាតិ ស្ថិតនៅភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ៕
