កាលពីម្សិលមិញប៉ូលិសកម្ពុជាបាននិយាយ ថា ពួកគេបានរុករកក្រុមជនជាតិភាគតិចម៉ុងតាញ៉ាមួយក្រុមពីវៀតណាម នៅតំបន់ព្រៃក្នុងខេត្ដរតនគិរីដែលបានឆ្លងព្រំដែនក្នុងការប៉ុន ប៉ងស្វែងរកសិទ្ធិជ្រកកោននៅ កម្ពុជា។
ក្រុមអង្គការសិទ្ធិមនុស្សឲ្យដឹងថា កាលពីខែមុនជនភាគតិចម៉ុងតាញ៉ា១៣នាក់ក្នុងនោះមានស្ដ្រីម្នាក់ បានរត់គេចចេញពីការធ្វើទុក្ខបុកម្នេញនៅក្នុងប្រទេសវៀតណាម ហើយតាំងពីពេលនោះមកបានលាក់ខ្លួននៅក្នុងខេត្ដរតនគិរី។
ស្នងការប៉ូលិសខេត្ដរតនគិរីលោក ងួន កឿន បានប្រាប់ទីភ្នាក់ងារព័ត៌មាន AFP ថាអាជ្ញាធរកំពុងស្វែងរកពួកគេ។ លោកថា ក្រសួងមហាផ្ទៃនឹងធ្វើការសម្រេចចិត្ដថាតើនឹងមានការបញ្ជូនពួកគេ ចេញពីកម្ពុជាវិញឬយ៉ាងណា។
ភ្លាមៗនេះ គេមិនទាន់អាចទាក់ទងក្រសួងការបរទេសវៀតណាមនៅក្រុងហាណូយបាននៅឡើយ ទេ ដើម្បីបញ្ជាក់ថា តើវៀតណាមនឹងស្វែងសុំឲ្យមានការបញ្ជូនពួកគេទៅវៀតណាមវិញ ឬយ៉ាងណា។
ប៉ុន្ដែលោក Pham Thu Hang មន្ដ្រីនៅក្រសួងការបរទេសវៀតណាមបានប្រាប់កាសែត AFP ថា ពលរដ្ឋគ្រប់ប្រទេសទាំងអស់ត្រូវគោរពច្បាប់ប្រទេសរបស់ខ្លួន និងច្បាប់នានាទាក់ទងនឹងបែបបទនៃការចេញចូលក្នុងប្រទេស។
កាល ពីសង្គ្រាមឥណ្ឌូចិន ពួកម៉ុងតាញ៉ាបានគាំទ្រដល់បារាំង ហើយក្រោយមកគាំទ្រទាហានអាមេរិកប្រឆាំងនឹងពួកកុម្មុយនីស្ដ ហើយបានប្រឈមមុខនឹងការធ្វើទុក្ខបុកម្នេញ និងការរើសអើងតាំងពីពេលចប់ចម្បាំងរាំងជល់នៅឆ្នាំ១៩៧៥។
លោក ឆាយ ធី មន្ដ្រីសម្របសម្រួលសិទ្ធិមនុស្សនៃអង្គការអាដហុកនៅរតនគិរីនិយាយថា ពួកម៉ុងតាញ៉ាទាំង១៣នាក់នេះរត់គេចចេញពីការធ្វើបាបនៅវៀតណាម ហើយចង់ស្វែងសិទ្ធិជ្រកកោន។
លោកបន្ដឲ្យដឹងថា ពួកគេខ្វះស្បៀង ហើយមានជំងឺគ្រុនចាញ់ ប៉ុន្ដែមិនហ៊ានចាកចេញពីព្រៃទេខ្លាចអាជ្ញាធរបញ្ជូនចេញទៅវៀតណាម វិញ។
ទីភ្នាក់ងារជនភៀសខ្លួនអង្គការសហប្រជាជាតិនិយាយថា ការបង្ខិតបង្ខំពួកគេឲ្យទៅវៀតណាមវិញ គឺជាការបំពានកាតព្វកិច្ចអន្ដរជាតិរបស់កម្ពុជា៕
