ខេត្តកំពង់ចាម៖ បុរសម្នាក់បានយកដំបងឈើវាយសម្លាប់បងស្រីបង្កើតរបស់ខ្លួនស្រាយកំហឹង ព្រោះតែរឿងគំនុំគោចូលស៊ីដំណាំ ខណៈ ដែលស្ដ្រីរងគ្រោះចេញពីភូមិទៅឃ្វាលគោចម្ងាយប្រហែល៣០០ម៉ែត្រពីភូមិ។
ហេតុការណ៍នេះ បានបង្កឲ្យមានការភ្ញាក់ផ្អើលនៅម៉ោង៦ល្ងាចថ្ងៃទី៤ ខែធ្នូ ឆ្នាំ២០១៤ នៅចំណុចខ្នារ ខាងកើតភូមិអូរតាសែងប្រហែល៣០០ម៉ែត្រ ក្នុងឃុំតាប្រុក ស្រុកចំការលើ ខេត្តកំពង់ចាម។
ស្ត្រីដែលស្លាប់មានឈ្មោះ យ៉ែម នាង អាយុ៥១ឆ្នាំ រស់នៅក្នុងភូមិ-ឃុំកើតហេតុខាងលើ។ សមត្ថកិច្ចបានទទួលដំណឹងពីប្រជាពលរដ្ឋថា ប្រទះឃើញសាកសពស្ត្រីដែលស្លាប់ដោយសារត្រូវជនមិនស្គាល់អត្តសញ្ញាណវាយនឹងឧបករណ៍រឹង។ ក្រោយពីទទួលបានដំណឹងខាងលើ សមត្ថកិច្ចចុះស្រាវជ្រាវករណីនេះ និងឈានដល់ការចាប់ខ្លួនជនសង្ស័យខាងលើបានតែម្តង។
សមត្ថកិច្ចបញ្ជាក់ថា ជនដៃដល់ដែលបានសម្លាប់ស្ដ្រីខាងលើជាប្អូនបង្កើតនឹងស្ដ្រីរង គ្រោះឈ្មោះ យ៉ែម ណាត អាយុ៤១ឆ្នាំ មានមុខរបរជាកសិករ រស់នៅភូមិ-ឃុំកើតហេតុជាមួយគ្នា ។
ជនសង្ស័យបាន ឆ្លើយសារភាពថា រូបគេពិតជាបានវាយ សម្លាប់បងស្រីរបស់ខ្លួនប្រាកដមែន ព្រោះតែគេខឹងហើយចងគំនុំរឿងបណ្តោយឲ្យគោចូលស៊ីដំណាំនៅក្នុងចម្ការរបស់ខ្លួន។
ជនសង្ស័យបានសារភាពទៀតថា មុនពេលដែលខ្លួនវាយសម្លាប់បងស្រី គឺបងស្រីរបស់ខ្លួនបានបណ្ដើរឆ្កែមកជិត និងក្បែរចម្ការហើយសត្វឆ្កែបងស្រី ក៏បានហក់មកខាំទើបមានការឈ្លោះប្រកែកគ្នាហើយពេលដែលបងស្រីជេរបញ្ជោរ មកលើខ្លួនទើបទ្រាំពុំបានក៏វាយសម្លាប់ ដើម្បីស្រាយគំនុំចាស់ដែលគោចូលស៊ី ដំណាំរបស់ខ្លួនផង។
សមត្ថកិច្ចនគរបាលបាននិងកំពុង កសាងសំណុំរឿងដើម្បីបញ្ជូនជនដៃដល់ទៅសាលាដំបូងខេត្ដកំពង់ចាមចាត់ការតាមនីតិវិធី៕
ប្អូនប្រុសចិត្ដតិរច្ឆាន សម្លាប់បងស្រីព្រោះតែគំនុំគោចូលស៊ីដំណាំ
សពស្ត្រី
