ភ្នំពេញ៖តំណាងអយ្យការបានបញ្ចប់ការសាក សួរ ហើយបញ្ជូនខ្លួនទៅឱ្យខាងសមត្ថកិច្ចវិញ ដោយតម្រូវឱ្យនាំខ្លួនមកសាលាដំបូងរាជធានីភ្នំពេញនៅវេលាព្រឹកថ្ងៃទី៧ ខែធ្នូ ដើម្បីសាកសួរតាមនីតិវិធីបន្ថែមទៀត។
គួរបញ្ជាក់ថា កាលពីវេលាម៉ោង៨ព្រឹក ថ្ងៃទី៦ ខែធ្នូនេះ សមត្ថកិច្ចបានបញ្ជូនខ្លួនឪពុក-ម្តាយ ប្រពន្ធទី២ និងប្អូនប្រុសបង្កើតរបស់ ថោង សារ៉ាត់ មកសាលាដំបូងរាជធានីភ្នំពេញដើម្បីឲ្យមន្ត្រីតុលាការសាកសួររហូតដល់វេលាម៉ោង ៤និង៥០នាទី នារសៀលថ្ងៃទី ៦ ខែធ្នូ ទើបផ្អាកការសាសួរ តែតម្រូវឲ្យសមត្ថកិច្ចនាំខ្លួនត្រឡប់មកវិញនៅព្រឹកថ្ងៃទី៧ ខែធ្នូ ដើម្បីបន្តនីតិវិធីបន្ថែមទៀត ។
មនុស្សសទាំង៤នាក់នោះរួមមាន៖ ១-ឈ្មោះ ថោង ចំរើន អាយុ៦៧ឆ្នាំ ជាឪពុក ថោង សារ៉ាត់ ២-ឈ្មោះ កែវ សារី ហៅ ចែហាយ អាយុ៥៥ឆ្នាំ ជាម្តាយ ៣-ឈ្មោះ ទាវ ធីតា អាយុ២៣ឆ្នាំ ជាប្រពន្ធទី២ របស់ថោង សារ៉ត់ និង៤-ឈ្មោះ ថោង ប៊ុនណា អាយុ៣៣ឆ្នាំ ជាប្អូនប្រុសបង្កើតរបស់ ថោង សារ៉ាត់។
ជនសង្ស័យទាំង៤នាក់ ត្រូវបានសមត្ថកិច្ច ចម្រុះឃាត់ខ្លួននកាលពីយប់ ថ្ងៃទី០៣ ខែធ្នូ នៅចំណុចបុរី៩៩៩ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ហើយត្រូវស្ថិតនៅក្រោមការសាកសួរពីកញ្ញា វ៉ា សក្កដា ព្រះរាជអាជ្ញារងអមសាលាដំបូងរាជធានីភ្នំពេញ។
ទិដ្ឋភាពនៅសាលាដំបូងរាជធានីភ្នំពេញនាព្រឹកថ្ងៃសៅរ៏ គេឃើញអាកប្បកិរិយារបស់ឪពុកនិងម្ដាយរបស់មេឃាតក ថោង សារ៉ាត់ សើច និងញញឹមហាក់ដូចជាគ្មានអ្វីកើតឡើងចំពោះខ្លួន សោះឡើយ។
គួររំលឹកថាឧកញ៉ា អ៊ឹង ម៉េងជឺ ថៅស៊ីម៉ង់ត៍ត្បូងពេជ្រ និង ម្ចាស់ហាងលក់គ្រឿងអលង្ការហុងកុង ត្រូវបានឃាតកបាញ់សម្លាប់ជាច្រើនគ្រាប់កាលពីព្រលប់ថ្ងៃទី២២ ខែវិច្ឆិកា ឆ្នាំ២០១៤ ពេលកំពុងចុះ ពីរថយន្តបំណងដើរចូលទិញផ្លែឈើនៅចំណុចខាងលិចអាងទឹកពហុកីឡដ្ឋានជាតិអូរឡាំពិក។ប្រមាណ១១ថ្ងៃក្រោយពីមានអំពើឃាតកម្មនេះកើតឡើង សមត្ថកិច្ចចម្រុះបានបើកប្រតិបត្តិការក្រសោបផ្ទះ និងទីតាំងមួយចំនួនរបស់ ថោង សារ៉ាត់ ហើយបានឃាត់ខ្លួនមនុស្សប្រមាណ១៤នាក់ ដែលគិតថាជាប់ពាក់ព័ន្ធនឹងឃាតកម្មខាងលើនេះ លើកលែងតែ ថោង សារ៉ាត ម្នាក់ប៉ុណ្ណោះដែលគេចខ្លួនបាត់៕ ម គ
