ភ្នំពេញ៖ បុរសវ័យចំណាស់ម្នាក់ បានស្លាប់ពេលបញ្ជូនទៅកាន់មន្ទីរ ពេទ្យពេទ្យមិត្តភាពខ្មែរ-សូវៀត ក្រោយពីជួបគ្រោះថ្នាក់ ចរាចរណ៍រវាងម៉ូតូនឹងរថយន្តទួរីសមួយគ្រឿងទៀត កាលពីវេលាម៉ោងប្រមាណ៤និង៥០នាទី រសៀលថ្ងៃទី១២ ខែកញ្ញា ឆ្នាំ២០១៤ ស្ថិតនៅមុខផ្សារសុវណ្ណា តាមផ្លូវលេខ២៧១ សង្កាត់ទំនប់ទឹក ខណ្ឌចំការមន ។
ប្រភព័ត៌មានពីកន្លែងកើតហេតុបានឲ្យដឹងថា មុនពេលកើតហេតុមានអ្នកបើកម៉ូតូម្នាក់ កំពុងធ្វើដំណើរតាមផ្លូវលេខ២៧១ លុះមកដល់មុខផ្សារសុវណ្ណាស្រាប់តែទាក់ដៃចង្កូត នឹងរទេះដឹកផ្លែដូងក៏ដួលចូលរថយន្តមួយគ្រឿងម៉ាកតូយ៉ូតា ប្រភេទ១២កៅអីដឹកទំនិញមកបុកពីក្រោយនិងកិនបណ្ដាយឲ្យបុរសវ័យចំណាស់ម្នាក់នោះបានស្លាប់ពេលបញ្ជូនទៅដល់មន្ទីរពេទ្យ។ ជនរងគ្រោះជិះម៉ូតូ ម៉ាកសេ១២៥ ពណ៌ក្រហម សេរីឆ្នាំ២០០៨ ពាក់ស្លាកលេខ កណ្តាល 1K-1690។
ក្រោយពីកើតហេតុ ម៉ូតូនិងរថយន្តទួរីសសមត្ថកិច្ចនាំយកទៅរក្សាទុកនៅអធិការដ្ឋានខណ្ឌចំការមន។
ជនរងគ្រោះត្រូវបានដឹកបញ្ជូនទៅកាន់មន្ទីរពេទ្យរុស្ស៊ីនៅក្បែរនោះ ប៉ុន្តែដោយរបួសធ្ងន់ធ្ងរពេកជនរងគ្រោះក៏ស្លាប់តែម្តង ហើយនៅកន្លែងកើតហេតុធ្វើឲ្យមានការកក ស្ទះចរាចរណ៍យ៉ាងខ្លាំងផងដែរ៕
