ប៉េកាំង៖ជាប្រទេសផលិតអាវុធធំជាងគេទី៣លើលោកក្នុងរយៈពេល៥ឆ្នាំកន្លងទៅនេះប្រទេសចិនបាននាំចេញគ្រឿងសព្វាវុធសឹងទ្វេដង ខណៈដែលប្រទេសចិនជាប្រទេសផលិតអាវុធធំជាងគេទី៣កំពុងតែបោះទុនយ៉ាងច្រើនទៅក្នុងឧស្សាហកម្មផលិតអាវុធទំនើបៗ។
របាយការណ៍របស់វិទ្យាស្ថានអន្ដរជាតិស្ដុកហូមស្រាវជ្រាវផ្នែកកិច្ចការសន្ដិភាពបានឲ្យដឹងថានៅចន្លោះឆ្នាំ២០១១ដល់២០១៥ ការនាំចូលគ្រឿងអាវុធទៅក្នុងប្រទេសចិនបានធ្លាក់ចុះ២៥%ប្រៀបនឹងពេល៥ឆ្នាំមុន ដោយជាសញ្ញាមួយបង្ហាញឲ្យឃើញនូវការកើនឡើងនៃការផលិតអាវុធនៅក្នុងស្រុកចិន។
វិទ្យាស្ថាននេះឲ្យដឹងទៀតថាពីឆ្នាំ២០១១ដល់២០១៥ការនាំចេញគ្រឿងអាវុធពីចិនបានកើនឡើង៨៨%ប្រៀបនឹងពេល៥ឆ្នាំមុន បើមិនរាប់គ្រឿងអាវុធធុនស្រាល។ នៅក្នុងរយៈពេលដូចគ្នាការនាំចេញគ្រឿងអាវុធចិនទៅពិភពលោកមានចំនួនតែប្រមាណ៦%ប៉ុណ្ណោះ គឺនៅចាញ់សហរដ្ឋអាម៉េរិក និងរុស្ស៊ីដែលជាប្រទេសធំជាងគេក្នុងការលក់គ្រឿងអាវុធ។
ចំពោះសម្ភារៈដែលចិនប្រើដើម្បីផលិតអាវុធនៅពេលនេះ មានគុណភាពខ្ពស់ជាងកាលពី១០ឆ្នាំមុន ហើយក៏ទាក់ទាញចំណាប់អារម្មណ៍ ពីទីផ្សារអាវុធធំៗក្នុងពិភពលោកមួយចំនួន។ យ៉ាងណាមិញចិននៅតែចាំបាច់ត្រូវការនាំចូលអាវុធបន្ថែមទៀតមានយន្ដហោះដឹកសព្វាវុធ ឧទ្ធម្ភាគចក្រ ម៉ាស៊ីនផលិតយន្ដហោះចម្បាំង យានជំនិះផ្សេងៗនិងនាវា។ ក្នុងឆ្នាំ២០១៥ ចិនបានចុះកិច្ចព្រមព្រៀងទិញប្រព័ន្ធការពារដែនអាកាស និងយន្ដហោះចម្បាំងជាច្រើនគ្រឿងពីរុស្ស៊ី ដែលនេះជាការផ្គត់ផ្គង់សព្វាវុធដ៏ធំបំផុត៕
