មូស្គូ៖ក្រសួងការបរទេសរុស្ស៊ីបានចេញមុខប្រកាសថា ការគំរាមកំហែងរបស់កូរ៉េខាងជើង ដោយប្រើនុយក្លេអ៊ែរបែបនេះ រុស្ស៊ីមិនអាចទទួលយកបានឡើយ ។ ទន្ទឹមនោះក៏អំពាវនាវភាគីទាំងអស់ក្នុងនោះកូរ៉េខាងត្បូង អាមេរិក និងកូរ៉េខាងជើង ត្រូវតែអត់ធ្មត់ និងប្រុងប្រយ័ត្នឱ្យបានខ្ពស់បំផុត ដើម្បីការពារពីការផ្ទុះជម្លោះប្រដាប់អាវុធ។
ស្ថានភាពនៅពេលនេះងាយនឹងបង្កជាជម្លោះ ក្រោយពីកូរ៉េខាងជើងចាប់ផ្ដើមសាកល្បងបាញ់អាវុធនុយក្លេអ៊ែរជាថ្មី ដើម្បីឆ្លើយតបនឹងការដាក់ទណ្ឌកម្មពីអង្គការសហប្រជាជាតិ។ នេះជាការបញ្ជាក់បន្ថែមពីក្រសួងការបរទេសរុស្ស៊ី។ យ៉ាងណាក៏ដោយ ក្រសួងការបរទេសរុស្ស៊ីនឹងពិចារណាក្នុងសេចក្ដីថ្លែងការណ៍របស់ កូរ៉េខាងជើងពាក់ព័ន្ធនឹងការគំរាមកំហែងនឹងសត្រូវ។ ក្រសួងការបរទេសរុស្ស៊ីថា ទីក្រុងព្យុងយ៉ាងត្រូវតែដឹងថាការធ្វើសកម្មភាពអត្តោម័តតែឯង អាចធ្វើឱ្យខ្លួន ជាប្រទេសឯកកោកាន់តែឆ្ងាយពីសហគមន៍អន្តរជាតិ។ មិនត្រឹមតែប៉ុណ្ណោះ កូរ៉េខាងជើងនឹងទទួលទណ្ឌកម្មកាន់តែធ្ងន់ធ្ងរពីអន្តរជាតិបន្តបន្ទាប់ ទៀត។
គួរបញ្ជាក់ថា កាលពីថ្មីៗនេះ កូរ៉េខាងជើងបានគំរាមប្រើនុយក្លេអ៊ែរប្រឆាំងនឹងកូរ៉េខាងត្បូង និងអាមេរិក បន្ទាប់ពីអាមេរិក-កូរ៉េខាងត្បូងចាប់ផ្ដើមធ្វើសមយុទ្ធប្រចាំឆ្នាំ កាលពីថ្ងៃទី០៧មីនា ដោយមានលក្ខណៈទ្រង់ទ្រាយធំជាងឆ្នាំមុនៗ ដោយមានវត្តមានកងទ័ពកូរ៉េខាងត្បូង៣សែននាក់និងកងទ័ពអាមេរិក១៥,០០០ នាក់៕
