អាមេរិក៖ប្រធានាធិបតីអាមេរិកលោក បារ៉ាក់ អូបាម៉ា បានលើកឡើងកាលពីម្សិលមិញ ដោយអំពាវនាឲ្យគ្រប់ភាគីជម្លោះនៅក្នុងប្រទេសស៊ីរី វិលរកតុចរចាដោយសន្តិវិធី ហើយផ្អាកការបាញ់គ្នាជាបណ្តោះអាសន្នសិន។ នេះបើយោងតាមសារព័ត៌មាន Channel News Asia។
ថ្លែងក្នុងសន្និសីទសារព័ត៌មាននៅអាល្លឺម៉ង់លោក អូបាម៉ា ថា កាលពីដើមសប្តាហ៍មុន លោកបាននិយាយទៅកាន់ប្រធានាធិបតីរុស្ស៊ីលោក វ្លាឌីមៀ ពូទីម ដើម្បីជជែកពីការធ្វើការរួមគ្នា ផ្អាកការបាញ់គ្នា និងធ្វើឲ្យភាគីពាក់ព័ន្ធចូលតុចរចាដើម្បីដោះស្រាយបញ្ហា។ ទោះយ៉ាងណាសេតវិមានលើកឡើងថា ការឈប់បាញ់គ្នាវាមិនទាន់គ្រប់គ្រាន់ទេក្នុងការដោះស្រាយបញ្ហា តែវាផ្លូវតែមួយគត់នៃច្រកចេញដើម្បីដោះស្រាយជម្លោះដែលមានការកាប់សម្លាប់ព្រៃផ្សៃជាង៥ឆ្នាំមកនេះ បានបណ្តាលឲ្យមនុស្សជាង២០០,០០០នាក់ស្លាប់៕
