ឥណ្ឌា៖ប្រធានតុលាការឥណ្ឌាលោក T S Thakur បានប្រកាសថា ស្ថាប័នតុលាការនៃប្រទេសឥណ្ឌា កំពុងតែប្រឈមមុខនឹងការខ្វះខាតចៅក្រមត្រូវបានចៅក្រមដើម្បីបញ្ចប់រឿងក្ដីដែលនៅសេសសល់។ នេះបើយោងតាមការចេញផ្សាយរបស់សារព័ត៌មាន Indian Express ចេញផ្សាយនៅថ្ងៃទី១០ ខែឧសភា នេះ។ ការប្រកាសនេះធ្វើឡើងក្រោយពេលដែលនាយករដ្ឋមន្ត្រីឥណ្ឌា លោក Narendra Modi បង្ហាញពីក្ដីបារម្ភចំពោះចំណាត់ការរបស់តុលាការថាមានភាពយឺតយ៉ាវ។
លោក T S Thakur ប្រធានតុលាការឥណ្ឌា បានចេញមុខប្រកាសថា ស្ថាប័នតុលាការត្រូវបានចៅក្រមបន្ថែមច្រើនជាង ៧ម៉ឺននាក់ ដើម្បីបញ្ចប់រឿងក្ដីដែលសល់។ ស្ថាប័នតុលាការឥណ្ឌា មិនបានធ្វើការយឺតយ៉ាវនោះទេ ប៉ុន្តែបច្ចុប្បន្នគឺកង្វះចៅក្រម។ ប្រធានតុលាការរូបនេះបញ្ជាក់ថា ក្នុងពេលដែលគណៈកម្មការច្បាប់នៃប្រទេសឥណ្ឌា កាលពីឆ្នាំ ១៩៨៧ បានស្នើឱ្យមានចៅក្រម ៤៤០០០នាក់ ដើម្បីដោះស្រាយពាក្យបណ្តឹងឱ្យមានប្រសិទ្ធិភាពនោះ បែរជាសព្វថ្ងៃនេះ ឥណ្ឌា មានចៅក្រមតែ ១៨.០០០នាក់ប៉ុណ្ណោះ។
លោក T S Thakur បានព្រមានថា ការខ្វះខាតចៅក្រម គឺជាសត្រូវដ៏គួរឱ្យភ័យខ្លាចនៅក្នុងប្រព័ន្ធយុត្តិធម៌ដែលឥណ្ឌាកំពុងតែប្រឈមមុខ។ រដ្ឋាភិបាល មិនអាចបដិសេធនូវសិទ្ធិជាមូលដ្ឋានក្នុងការដាក់ពាក្យបណ្តឹងរបស់ប្រជាជនបានឡើយ៕
