ភ្នំពេញ៖ សាលាដំបូងរាជធានីភ្នំពេញបាន ប្រកាសសាលក្រមផ្តន្ទាទោសជនជាប់ចោទចំនួន៥នាក់ដាក់ពន្ធនាគារ ក្នុងម្នាក់ៗរយៈពេល៧ឆ្នាំ និងបង្គាប់ឲ្យរួមគ្នាសងប្រាក់ជំងឺចិត្តចំនួន២.០០០ដុល្លារអាមេរិក ឲ្យទៅនារីរងគ្រោះពីបទ«រំលោភបូក»។
សាលក្រមដែលប្រកាសនៅព្រឹកថ្ងៃទី២ ខែធ្នូ ឆ្នាំ២០១៤ ដោយលោកចៅក្រម នូ វាសនា បានឲ្យដឹងថា ជនជាប់ចោទចំនួន៥ នាក់ ទី១.ឈ្មោះ ឡុង រ៉ាវុទ្ធ ហៅណែត អាយុ២៣ឆ្នាំ ទី២.ឈ្មោះ យ៉ា សុខុម ហៅឡាយ អាយុ២៥ឆ្នាំ ទី៣.ឈ្មោះ ផាន់ ចាន់ធឿន អាយុ២៤ឆ្នាំ ទី៤.ឈ្មោះ សរ ធុន អាយុ២៤ឆ្នាំ និងទី៥.ឈ្មោះ ឆន ចាន់និត (រត់គេចខ្លួន) អាយុ២៤ឆ្នាំ។ជនជាប់ចោទទាំង៥នាក់មាន ទីលំនៅក្នុងភូមិ-សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
គួររំលឹកថា ជនទាំងនោះត្រូវបានសមត្ថកិច្ចនគរបាលព្រហ្មទណ្ឌក្រសួងមហាផ្ទៃឃាត់ខ្លួនកាលពីថ្ងៃទី២១ ខែធ្នូ ឆ្នាំ២០១៣ យោងតាមពាក្យបណ្ដឹងរបស់ ម៉ុក ស្រីនិច ដែលត្រូវជាបងស្រីបង្កើតរបស់នារីរង គ្រោះឈ្មោះ (ហ.ស.ម) ភេទស្រី អាយុ២១ឆ្នាំ មុខរបរជាកម្មការិនីរោងចក្រ ដែលត្រូវជនសង្ស័យបានប្រព្រឹត្ដបទល្មើសរំលោភបូកទៅលើនារី រងគ្រោះកាលពីថ្ងៃទី១១ ខែធ្នូ ឆ្នាំ២០១៣ នៅភូមិសង្កាត់ចោមចៅ ខណ្ឌពោធិ៍សែនជ័យ៕ ម គ
