នីហ្សេរីយ៉ា៖អង្គការ UNICEF បានឲ្យដឹងនៅថ្ងៃព្រហស្បតិ៍ថា កុមារជិតកន្លះលាននាក់នៅជុំវិញបឹងឆាដបានប្រឈមមុខនឹង “បញ្ហាកង្វះអាហារូបត្ថម្ភធ្ងន់ធ្ងរ” ដោយសារតែគ្រោះរាំងស្ងួតនិងការបះបោររយៈពេលប្រាំពីរឆ្នាំរបស់ក្រុមសកម្មប្រយុទ្ធឥស្លាមបូកូហារ៉ាមនៅភាគឦសានប្រទេសនីហ្សេរីយ៉ា ។
ក្នុងចំណោមកុមារ៤៧៥.០០០នាក់ដែលត្រូវបានចាត់ទុកថាប្រឈមនឹងគ្រោះថ្នាក់ គឺមាន៤៩.០០០នាក់នៅក្នុងរដ្ឋ Borno ប្រទេសនីហ្សេរីយ៉ានឹងស្លាប់ក្នុងឆ្នាំនេះប្រសិនបើពួកគេមិនទទួលបានការព្យាបាល។ នេះបើយោងតាមទីភ្នាក់ងារកុមាររបស់អង្គការសហប្រជាជាតិដែលកំពុងអំពាវនាវសុំជំនួយទឹកប្រាក់៣០៨លានដុល្លារអាមេរិកដើម្បីទប់ទល់នឹងវិបត្តិនេះ។
ទោះយ៉ាងណាក៏ដោយ មកដល់ពេលនេះ អង្គការ UNICEF បានឲ្យដឹងថា ខ្លួនទទួលបានតែ៤១លានដុល្លារតែប៉ុណ្ណោះពោលគឺស្មើនឹង១៣ភាគរយនៃអ្វីដែលខ្លួនត្រូវការដើម្បីជួយដល់អ្នកដែលរងផលប៉ះពាល់នៅក្នុងប្រទេសទាំងបួនដូចជា ឆាដ នីហ្សេរីយ៉ា នីហ្សេរនិងកាមេរូនដែល ជាប់ព្រំដែនបឹងឆាដ។អង្គការ UNICEF បានឲ្យដឹងថា នៅពេលដែលកងកម្លាំងរដ្ឋាភិបាលនីហ្សេរីយ៉ាបានចាប់យកនិងទទួលបានទឹកដីមកវិញ មន្ត្រីផ្នែកជំនួយបានចាប់ផ្តើមប្រមូលផ្តុំគ្នា៕
